Qeveria gjermane synon të intensifikojë dëbimin e personave që nuk kanë të drejtë të qëndrojnë në Gjermani, u bë e ditur pas mbledhjes së qeverisë në Berlin.
“Ne do të sigurohemi që njerëzit që nuk kanë të drejtë të qëndrojnë në Gjermani të largohen më shpejt nga vendi ynë”, tha ministrja e Brendshme Nancy Faeser.
Ajo tha se dëbimi i atyre që nuk kanë të drejtë të qëndrojnë në Gjermani është i domosdoshëm në mënyrë që të mund të përmbushin detyrimet ndaj atyre që vërtet kanë nevojë për ndihmë dhe mbrojtje humanitare.
“Shtrëngimi i ligjit është i nevojshëm në mënyrë që ata të mund të vazhdojnë të përmbushin përgjegjësinë e tyre ndaj njerëzve që kërkojnë mbrojtje nga terrori dhe luftërat, siç është rasti, për shembull, me mbi 1.1 milionë refugjatë nga Ukraina”, shtoi ministrja socialdemokrate.
Një proces më efikas i dëbimit
Qëllimi i projektligjit, i cili ende duhet të kalojë në procedurë parlamentare, është të reduktojë rrethanat aktuale rënduese që pengojnë një proces më efikas të dëbimit nga Gjermania.
Kështu, ndalimi që i paraprin dëbimit mund të zgjasë 28 ditë në vend të 10 ditëve aktuale. Gjithashtu, policia do të jetë në gjendje të kërkojë persona në listën për dëbim në shtëpitë e strehimit të refugjatëve dhe të hyjë në ambientet e banorëve të tjerë të akomodimit.
Po kështu, nuk do të kishte më një njoftim për dëbim, gjë që në të kaluarën shumëkush strehohej në një adresë të panjohur përpara deportimit, dhe është e mundur të inspektohen celularët dhe kompjuterët për të konfirmuar shtetësinë e personit që duhet të dëbohet.
Dëbimet shpesh dështojnë sepse njerëzit të cilëve nuk u është dhënë statusi i refugjatit ose u është mohuar azili shkatërrojnë dokumentet e tyre personale dhe refuzojnë të japin një deklaratë të origjinës, kështu që autoritetet nuk mund të përcaktojnë se në cilin vend duhet të deportohen.
Gjithashtu do të hiqen pengesat ligjore për të mundësuar dëbimin më të shpejtë të personave që kanë shkelur ligjin ose të personave që konsiderohen të rrezikshëm për shkak të prejardhjes së tyre ekstremiste.
Dëbimi i pamundur për arsye të ndryshme
Në Gjermani, 7,861 persona u dëbuan në gjashtë muajt e parë të këtij viti, kryesisht qytetarë të Maqedonisë së Veriut dhe Gjeorgjisë. Në të njëjtën kohë, 280,000 njerëz jetojnë në Gjermani pa të drejtë qëndrimi.
Por pjesa dërrmuese e tyre nuk mund të deportohen për arsye të ndryshme, ndër të cilat më të shpeshtat janë mungesa e dokumenteve të udhëtimit apo sëmundjet.
Qeveria njoftoi gjithashtu rritjen e kontakteve me vendet nga të cilat vijnë më shpesh njerëzit që nuk kanë mundësi të marrin azil në Gjermani, si vendet e Magrebit ose India dhe Pakistani, si dhe Gjeorgjia dhe Moldavia.
Opozita kërkon që këto vende të shpallen të ashtuquajturat vende të sigurta, të cilat do të mundësonin një procedurë më të shpejtë për refuzimin e azilit.
Opozita Kristian Demokrate nga Unioni CDU/CSU kërkoi, përveç masave të shtuara të dëbimit, ndalimin e “emigrimit të parregulluar” drejt Gjermanisë në kufijtë e jashtëm të Bashkimit Evropian.
Masa më të ashpra për të ndaluar emigrantët e paligjshëm
Gjithashtu opozita, populiste e krahut të djathtë Alternativa për Gjermaninë (AfD) ka kërkuar masa më të rrepta për të ndaluar emigrantët e paligjshëm.
“Për sa kohë që emigrantët e paligjshëm nuk ndalohen në kufi, por tërhiqen nga përfitimet sociale që veprojnë si magnet i migrantëve, masa të tilla si heqja e pengesave për dëbimet më të shpejta janë simbolike,” tha AfD.
Organizatat humanitare, si dhe pjesë të Partisë së Gjelbër në pushtet, janë kundër lehtësimit të dëbimeve për shkak të masave që shkelin të drejtën e privatësisë.
Mbi 300 mijë kërkesa për azil janë regjistruar këtë vit në Gjermani dhe vlerësohet se numri i refugjatëve mund të arrijë shifrat rekord të vitit 2015. /tesheshi.com/
