Kreu i Partive Popullore Europiane, Manfred Weber, tha se Bashkimi Europian duhet të bëjë çmos për të anëtarësuar sa më shpejt vendet e Ballkanit Perëndimor në Union, pasi duket se Donald Trump mund të bëhet sërish President i SHBA.
Nëse ndodh kjo, paralajmëroi ai, gjërat do të komplikohen më tej.
“Donald Trump ka hedhur hapat e parë drejt Shtëpisë së Bardhë, me (fitoren në) Ioëa. E dimë që bota do të ndryshojë nëse Donald Trump rizgjidhet. Dhe Europa duhet të përgatitet për këtë tani. Kemi kohë të vështira përpara për Bashkimin Europian. Prandaj kohezioni është i rëndësishëm”, tha Webber në një konferencë të përbashkët me kryeministrin Edi Rama dhe kryeministrin e Bavarisë, Markus Söder.
Por Rama nga ana e tij, i cili ndodhet në landin gjerman i ftuar për të marrë pjesë në takimin tradicional të fillimvitit të Unionit Social-Kristian (CSU), nuk e përmendi Trumpin, siç bëri vite më parë para zgjedhjes së tij, kur tha që “larg qoftë të zgjidhet ai president”, gjë që ndodhi, por pa ndonë kosto në raportet mes tyre apo SHBA-Shqipëri nën presidencën e republikanit manjat.
“Ne besojmë se është e rëndësishme në mënyrë që të forcohet Bashkimi Europian në konkurrencën globale. Gjithashtu besoj se një Europë e fortë, e zgjeruar, është shumë, shumë e rëndësishme, sidomos në lidhje me gjithë Ballkanin Perëndimor, pikërisht për shkak të sfidave me të cilat po përballet Europa nga jashtë”, tha Rama. /tesheshi.com/
