Gjyqi i pesë ekstremistëve të ekstremit të djathtë që planifikonin të rrëmbenin ministrin e shëndetësisë për të ndezur një luftë civile në Gjermani filloi të mërkurën në Koblenz.
Rasti tregon rritjen e inatit ndaj politikanëve në vend, komentoi ministri i shënjestruar, Karl Lauterbach, në një intervistë të dhënë për revistën gjermane Der Spiegel.
Në çdo rast, gjyqi pritej me padurim në Gjermani, ku ekstremizmi i ekstremit të djathtë renditet në ballë të kërcënimeve me të cilat përballet vendi. Ideologjia e Reichsbürger, Qytetarëve të Rajhut që kundërshtojnë vlerat demokratike, ka parë një rritje të konsiderueshme kryesisht pas ndalimeve të zbatuara gjatë pandemisë Covid-19.
Katër burra dhe një grua janë në gjyq për komplot për “krijimin e dhunshëm të kushteve të luftës civile në Gjermani”, sipas zyrës së prokurorit federal përgjegjës për rastet e terrorizmit. Plani përfshinte rrëmbimin e ministrit të shëndetësisë të qeverisë së Olaf Solz, i cili ishte i papëlqyer në qarqet që protestonin kundër masave kufizuese të vendosura për shkak të pandemisë. Grupi dëshironte “të shkaktonte përmbysjen e qeverisë dhe republikës gjermane”, sipas aktakuzës.
Projekti përfshinte tre faza. Në të parën ata do të sabotonin infrastrukturën e energjisë elektrike për të shkaktuar ndërprerje në të gjithë vendin. Do të pasonte rrëmbimi i ministrit, pasi truprojat e tij do të vriteshin paraprakisht. Me veprimet e tyre ata do të krijonin kushte “lufte civile” dhe do të emëronin një lider të ri, rreth të cilit ata vetë do të merrnin një “rol qendror” në pushtetin ekzekutiv.
Gruaja e vetme, 75-vjeçarja Elisabeth R., kishte rolin e “udhërrëfyesit shpirtëror” të grupit, tha të mërkurën Prokurori i Përgjithshëm Wolfgang Barrott. Gjatë viteve ajo kishte zhvilluar “një mënyrë të menduari që bazohej në antisemitizëm”, shtoi ai. Mësuesja në pension dhe bashkëpunëtorët e saj vunë në dyshim legjitimitetin e Republikës Federale dhe ëndërruan për një kthim në Rajhun e Dytë të 1871, kur mbreti prusian William I ishte kurorëzuar perandor.
Megjithatë, ata do të bënin disa “rregullime” të regjimit, për shembull duke u dhënë grave të drejtën e votës.
Grupi u përpoq të fitonte favorin e Presidentit rus Vladimir Putin dhe i dërgoi atij një letër të shkruar nga Elizabeth R. Ata gjithashtu planifikuan t’i afroheshin Presidentit polak Andrzej Duda, me të njëjtin qëllim.
Gjatë leximit të aktakuzës Elizabeth R. pothuajse vazhdimisht e kishte kokën të përkulur.
Disa muaj pas arrestimit të të pestëve, autoritetet gjermane çmontuan një grup tjetër të armatosur komplotistësh që përfshinte një aristokrat dhe ish-ushtarak që planifikonte të rrëzonte institucionet dhe të sulmonte Bundestagun. /tesheshi.com/
