Ka mjaftuar lagështia në rrugë prej shiut dhe një ecje me shpejtësi e një automjeti, për të sjellë si pasojë katër jetëhumbje.
Gjëma ka ndodhur në bypass-in e Tepelenës, poshtë kalasë së këtij qyteti, që është pjesë e aksit nacional Tepelenë-Gjirokastër.
Thuhet paraprakisht se një automjet, duke ardhur në drejtimin jugor, pra në dishezë, ka humbur kontrollin dhe si pasojë është përplasur me dy automjete të tjera që qarkullonin në drejtim të kundërt.
Njoftimi policor thotë:
“Rreth orës 19:00, në aksin rrugor Tepelenë-Memaliaj, janë përfshirë në aksident rrugor tre automjete.
Si pasojë e përplasjes së automjeteve kanë humbur jetën katër shtetas ende të paidentifikuar dhe janë dëmtuar dy shtetas të tjerë të cilët janë dërguar për ndihmë mjekësore në Spitalin Rajonal Gjirokastër.
Grupi hetimor po punon për sqarimin e rrethanave dhe shkakut të aksidentit”.
Personat që kanë humbur jetën janë: Riza Astrit Rapaj, 42 vjeç; Lavdosh Bega, 62 vjeç; Lefteri Bega, 57 vjeçe dhe Afërdita Meta, 85 vjeçe.
Sakaq, për këtë aksident reagoi dhe ministri Balla.
“I pikëlluar për humbjen e katër jetëve dhe dy të plagosur në aksidentin tragjik të natës së sotme pranë Tepelenës. Zbatimi i rregullave të qarkullimit rrugor nga përdoruesit e rrugës është detyrim ligjor e përgjegjësi ndaj jetës. Ndërsa Policia Rrugore duhet të rrisë edhe më shumë kontrollet dhe forcën parandaluese”, shkruan Balla. /tesheshi.com/
