Majlinda Bregu, një ndrë ministret e PD-së në kohën e qeverisjes Berisha, ka folur për herë të parë mbi krizën në forcën e saj, çarjen më dysh.
Pjesëmarrëse në mbledhjen e Këshillit Kombëtar të Integrimit, ku fokusi ishte Procesi i Berlinit dhe tregu i përbashkët rajonal, ajo, e nxitur nga pyetjet e gazetarëve, ajo u detyrua të fliste për gjëmën n ëish-kampin e saj politik.
“Deri diku besoja se ai shembulli i keq i dhënë në momentin kur Lulzim Basha mori një parti dhuratë dhe nuk diti ta menaxhonte, përveçse e shkatërroi, do të ndalej me të, por mesa duket nuk u ndal. Domethënë partia dhuratë që mori Lulzim Basha i shkoi dhuratë Enkelejd Alibeajt dhe ja ku jemi.
Nuk të bën logoja kryetar, sikurse nuk të bën kryetar as vetëm vula. Por ky nuk është problemi kryesor, nuk është problemi për të gjetur fajtorin sot, nuk është problemi për t’i thënë dikujt ‘ti nuk je i zoti’, apo ‘pse u katandis partia me 11 kandidatë’.
Problemet janë aq të mëdha në PD, të strukturuara vit pas viti, sa sot është tërësisht e vështirë dhe fatkeqësisht mesa duket do të duhet të bëhet ende më keq për t’u bërë nesër më mirë”, u shpreh Bregu, e cila edhe ajo, siç dhe Basha, qe pjesë e KOP-it në 2005-ën. Më pas u gjendën të dy në një kabinet, por kurrë mes tyre nuk pati afërsi politike. /tesheshi.com/
