I futur në lojë në çerekorëshin e fundit, Oliver Giroud ka rezultuar vendimtar për Arsenalin, teksa me një gol të tij në minutën e 89-të ka shmangur një humbje thuajse të sigurt.
Mançester Junajted – Arsenal, një prej sfidave më të ndezura të kampionatit anglez, ka nisur me një presion të lehtë të vendasve, por me një lojë të karakterizuar nga gabime të shumta në pasime.
Ndërsa pjesa e parë po i afrohej fundit, Cech, ruajtësi i portës së Arsenalit, bëri dy pritje të shkëlqyera. Edhe pse pati dhe një pretendim për 11-metërsh nga lojtarët e Mançesterit, 45 minutat e para u mbyllën pa gola.
Arsenali vijoi të ishte dhe në pjesën e dytë mjaft i tërhequr, duke mos rrezikuar thuajse fare portën kundërshtare.
Në të kundërt, Mançesteri filloi të shihte shumë përpara, dhe përpjekjet do të konkretizoheshin në minutën e 68-të, kur Mata shënoi me një gjuajtje brenda zonës, i pambuluar nga “topçinjtë”.
Venger bëri dy zëvendësime; Giroud dhe Xhaka do ta shtynin ekipin përpara.
Dhe në të vetmin rast që Arsenali goditi portën, Giroud e dërgoi topin në rrjetë me një gjuajtje të fuqishme me kokë.
Ndeshja do të përfundonte 1-1; i treti barazim radhazi për Mançester Junajtedin në Premier League në ndeshjet në shtëpi.
Miqtë morën atë që deshën, edhe pse nuk merituan të barazonin. Aspak të rrezikshëm në sulm, ndryshe nga rëndom, ata shënuan atëherë kur duhej.
Mourinho dhe Venger patën një shtrëngim të ftohtë duarsh në fillim e në mbarim të lojës, veçse qenë të kujdesshëm të mos krijonin tension mes tyre.
Arsenali shkon në kuotën e 25 pikëve, për momentin në vend të tretë. 19 pikë ka Mançester Junajtedi, në vend të gjashtë në klasifikim. /tesheshi.com/
