Përfaqësuesja e Argjentinës po kalon një periudhë të vështirë e të pështjelluar pas humbjes së dytë radhazi në finalen e Kupës së Amerikës. E për më tepër ndaj të njëjtit kundërshtar, Kilit, e në të njëjtën mënyrë, me 11-metërsha.
Fillimisht do të ishte Lionel Messi, që tejet i zhëgnjyer nga humbja, do të deklaronte se nuk do të luante për kombëtaren argjentinase. Për t’u pasuar nga lajmet se të tjerë lojtarë ishin gati të bënin gjë.
Dhe ja ku afrohen Lojërat Olimpike. Gerardo Martino nuk është në gjendje të krijojë një ekip me 18 lojtarë. Klubet nuk janë të gatshme t’i lëshojnë lojtarët, ndërsa aktiviteti fillon me nisjen e gushtit, koha kur ato bëhen gati për sezonin e ri.
Vetëm nëntë lojtarë janë aktualisht të mbledhur me skuadrën olimpike të Argjentinës. Hallin e shton më shumë drejtuesi i Komitetit Olimpik të Argjentinës, i cili ka lënë të kuptohet se në Lojërat Olimpike mund të mos dërgohet një ekip.
Dhe kështu Martino ka zgjedhur të japë dorëheqjen. Ish-trajneri i Barcelonës flet për “mungesë vendimesh” të federatës së futbollit në një deklaratë të dorëheqjes së tij, e për probleme serioze në fazën përzgjedhëse të një skuadre për Lojërat Olimpike.
Gerardo Martino u vu në krye të Argjentinës dy vite të shkuara, pas humbjes ndaj Gjermanisë në finalen e Kupës së Botës në Brazil. 19 fitore, shtatë barazime dhe tre humbje pati ai me përfaqësuesen gjatë periudhës së drejtimit të tij. Megjithatë, Martino dështoi t’i sillte Argjentinës një trofe pas dekadash pritjeje. /tesheshi.com/
