Sadiq Khan, kandidati i Partisë Laburiste të Britanisë së Madhe për kreun e Bashkisë së Londrës është në krye, ndërkohë që ende nuk janë numëruar më shumë se 50% e kutive.
Metropoli më i madh i Europës, me më shumë se 8 milion e gjysëm banorë, sipas të gjitha gjasave do të ketë një mysliman në krye të saj.
Siç bën të ditur BBC-ja nga 45% të votave të numëruara, kandidati laburist Sadiq Khan ka një avantazh prej 10 pikësh distancë nga rivali konservator, Zac Goldsmith.
Sipas një rregulli të vendosur nga Komisioni i Zgjedhjeve, nëse kandidati ka marrë më shumë se 50% kur janë numëruar gjysma e votive të qytetit, atëherë shpallet rezultati.
Në rast se asnjëri nuk e arrin këtë kuotë, nis përpunimi i votave që do të numërohen në pjesën e dytë dhe rezultatet pritet të zbardhen në mbrëmje vonë.
Përveç Londrës, në Britaninë e Madhe u zhvilluan zgjedhjet lokale në të gjithë vendin, por edhe zgjedhjet e pjesshme për një deputet në Skoci.
Partia Laburiste, në nivel kombëtar ka humbur vota megjithëse është parti e parë në vend, çka pritet të sjellë kërkesën për shkarkim të liderit radikal Jeremy Corbyn.
/tesheshi.com/
