Pas shtimit të rasteve me infeksione në kushte lirie, epidemiologeë e mjekë të njohur infeksionistë në Shqipëri, nga ata që muajt e fundit janë bërë referencë për publikun me shpjegime e këshilla, kanë përcjellë një apel për kujdes.
Tashmë, në kushte lirie, kur nuk ka më karantimin të detyruar, as distancë sociale gjithashtu, e ku gjithçka varet nga ndërgjegja e njerëzve, ata kërkojnë nga këta të fundit që të marrin në konsideratë faktin se virusi është ande aktiv, edhe kërcënues gjithashtu.
Dr. Pëllumb Pipero, duket se është dorëzuar në raport me parashikimet.
“T’ju them të vërtetën nuk prisnim të kishim numër të lartë të rasteve në Qershor, por pas lehtësimit të masave të distancimit social, kjo ka ndodhur. Ajo që dua të them është që të mos ulim vigjilencën, të vijojmë të jemi të kujdesshëm pasi virusi është ende në qarkullim, tha Pipero.
Nga ana tjetër, tProf. Tritan Kalo, tha se “e rëndësishme është që njerëzit nuk duhet të ulin kurrë vëmendjen ndaj vetes, ndaj përkujdesit të higjienës dhe sjelljes në kolektiv, në mënyrë që të mos të harrojmë disa norma që i fituam gjatë javëve të vetëizolimit. “Ndërgjegjësimi, kujdesi, higjiena, mbeten parësore në përballje të infeksionit të kësaj natyre sikundër është SARS COV2”, tha Profesor Kalo.
Najada Çomo, Shefja e shërbimit infektiv, tha se “ky shtim i rasteve shoqërohet me raste të rënduara, ku mbizotëron Tirana”.
“Kur ke pacientë në terapi intensive do të thotë që situata është realisht për t’u tërhequr vëmendja e popullatës, për shkak se është e vërtetë që është ulur vëmendja. Nuk janë vetëm moshat që janë me sëmundje kronike të shtruar në shërbimin infektiv, por aktualisht ka mosha të reja që janë në terapi intensive dhe kuptoni çdo të thotë të jesh në terapi intensive në një moshë shumë të re”, theksoi Dr.Çomo.
Dr. Esmeralda Meta tha se “shtimi i numrit të rasteve është një kambanë për popullatën. Ne jemi në shërbim për pacientët, për të cilët jemi jo vetëm mjekë por zëvendësojmë disi edhe familjarët të cilët ata nuk kanë mundësi t’i takojnë. Ajo që u kërkohet të gjithë qytetarëve është të tregojnë kujdes”, theksoi ajo. /tesheshi.com/
