Kompania e njohur e sondazheve Gallup ka bërë një studim në shumë vende të botës për llogari të OKB-së, përkatësisht me porosi të UNCHR-së.
Sipas këtij sondazhi, 14 përqind e popullsisë së botës dëshiron të emigrojë nga vendi i origjinës.
Po për Shqipërinë shifra është shokuese: 58 përqind e banorëve të kualifikuar, me shkollë dhe me ambicie e kërkesa për jetë, duan t’ja mbathin një minutë e më parë.
Gallup thekson se mbi 710 milionë persona në gjithë botën duan të largohen nga vendi i tyre.
Kjo kompani ka pyetur direkt mbi 586 mijë veta në 156 vende të ndryshme të botës.
Shtetasit më dëshirën më të lartë për të emigruar nga vendi i tyre janë qytetarët e Sierra Leones, një vend i mbërthyer nga luftrat civile dhe konfliktet e armatosura.
Sipas Gallup, 62 për qind e popullsisë së Sierra Leones do të donte të largohej nga vendi. E dyta renditet Shqipëria, me përqindje të barabartë me Hahitin.
Sondazhi vë në dukje se më shumë se gjysma e shqiptarëve, përkatësisht 56 për qind e popullsisë duan të largohen nga Shqipëria. Pas Shqipërisë, vijnë dy vende të tjera afrikane, Liberia me Kongon, ndërsa Siria rezulton në vendin e nëntë.
Gjetjet e sondazhit i përkasin periudhës 2013-2016. Përveçse në tre vendet me përqindjen më të lartë në botë të popullsisë që do të emigrojë, Shqipëria është edhe ajo që ka shënuar rritjen më të madhe të këtij treguesi vitet e fundit.
Sipas Gallup, në periudhën 2010-2012 pjesa e shqiptarëve që donin të emigronin ishte vetëm 36 për qind. Ndërsa në 3 vitet pasardhëse pjesa e popullsisë që do të largohet nga Shqipëria gati është dyfishuar, duke arritur në 56%. /tesheshi.com/
