Nga Mensur Krasniqi
Nuk dihet nëse pronari i vet klubit të Interit Erik Thohir e don klubin më shumë se djaloshi 12-vjeçar nga Shkupi, Gazmend Alii. Gazmendi në Shkup e rrethinë njihet me pseudonimin “Gagi”, ndryshe tifozi më i flaktë i klubit italian nga Milano, atij të Interit. Nuk është si ata tjerët që kanë uniformat me markë të shtrenjtë të klubit, apo se ka vizituar stadiumin e Giusepe Meazza-s, ngaqë kushtet financiare nuk i’a mundësojnë një luks të tillë.
Më e dhimbshme se kjo është fakti që Gagi i vogël edhe ndeshjet e klubit të zemrës nuk mund t’i ndjek as në ambient shtëpiak. Që kur liga italiane nuk transmetohet në televizionet nacionale të Maqedonisë, Gagi çdo ndeshje të Interit e ndjek në kabllovik në çajtoren e lagjes së tij “Te Metini”.
Çajtorja si vend është për të rritur, meqë aty edhe pihet duhani, ku në asnjë mënyrë nuk lejohet hyrja e fëmijëve, mirëpo kjo rregull në fundjavën që zhvillon ndeshjet e saj Interi për Gagin bën përjashtim.
Gagi për portalin tesheshi.com rrëfehet mbi arsyet e dashurisë së klubit. Dhe për të nuk është e rëndësishme nëse Interi fiton apo humb. Ai i mbetet besnik klubit si në fitore ashtu edhe në humbje, madje thotë se është lindur për të vdekur interist.
“Unë e dua Interin prej më i vogël. Edhe vëllezërit e mi më të mëdhenj poashtu janë tifozë të Interit. Si duket kjo është trashëgimi familjare. Për mua, Interi edhe kur luan mirë edhe kur luan keq nuk ma humb dashurinë që kam për këtë klub. Pra thjesht kam lindur për të vdekur interist.
Po ajo që është problematike qe dy apo tre vite nuk kam mundësi ta shikoj asnjë ndeshje në shtëpi. Kështu pra e falenderoj Metinin që asnjëherë nuk më ka bërë problem që të hyjë e ta shikoj ekipin tim në çajtoren e tij”, shprehet i emocionuar Gagi.
Po çka bën Gagi kur në të njëjtin termin kur edhe luan Interi, ka ndonjë ndeshje më të rëndësishme të xhiros se ajo e Interit?
“Ndodh ndonjëherë që në çajtore të mos e japin Interin dhe ta lëshojnë ndonjë ndeshje tjetër. Kuptohet që mërzitem shumë, dhe bëj përpjekje që të gjej ndonjë vend tjetër ta shikoj, nëse jo atëherë për çdo 5 minuta pyes për rezultatin e ndeshjes më të mëdhenjtë e lagjes”, përgjigjet pyetjes i mërzitur Gagi.
Ndryshe Gagi edhe vet mirret me sport, gjegjësisht futboll. Për momentin është portjer në klubin e “Al Barcas” në Shkup. Ai shpreson se ndonjë ditë do ti realizohet ëndërra dhe të arrijë në majat e suksesit si portjer profesional, e pse jo duke mbrojtur shtyllat e zikaltërve. /tesheshi.com/
