Aksidenti ajror që ndodhi në Rusi në orët e para të së shtunës, e prej të cilit humbën jetën 62 personat në të, 55 prej të cilëve ishin pasagjerë, mund të jenë shkaktuar nga një gabim njerëzor apo nga një defekt teknik.
Këto janë dy versionet që po ndjekin ekspertët rusë të cilët po hetojnë për shkaqet e rrëzimit të avionit. Nga sa mësohet, pilotët e avionit janë paralajmëruar për kushtet e rënduara të motit, por që gjithsesi jo kritike, e për shikueshmërinë e “moderuar”.
Një analist i çështjeve të fluturimit deklaroi për Russia Today se është e pazakontë që një avion të sillet rrotull në ajër për dy orë ndërkohë që avionët e tjerë ulen apo ngrihen në mënyrë të sigurt.
Ekspertë të tjerë sugjerojnë që avioni mund të ketë goditur një xhep ajri gjatë uljes, gjë që ka çuar në përplasjen. Erërat dhe turbulencat në lartësi të ulët mund ta kenë nxjerrë po ashtu avionin jashtë kontrollit.
Ndër faktet që jepen në mbështetje të idesë se mund të ketë qenë një gabim njerëzor, janë si lodhja e pilotëve nga qëndrimi për dy orë në ajër mbi qytet, ashtu edhe mosnjohja e pistës prej tyre ndërsa mund ta kenë pasur për herë të parë uljen në këtë aeroport.
Avioni i kompanisë ajrore FlyDubai u shkërmoq thuajse plotësisht gjatë përplasjes në tokë, duke u marrë jetën të gjithë atyre që po fluturonin me të. Ai ishte nisur nga Dubai për në qytetin rus Rostov-na-Donu. /tesheshi.com/
