Disa vite më parë, shqiptarët blinin këtë mall vetëm nga nevoja për t`u veshur, ndërsa sot e blejnë këtë mall edhe nga nevoja për t`u veshur bukur…
Nga Bukurie Hysenukaj
Kush tallet me “Gabin”, një fjalë që i përngjan një ankronimi brenda së cilit ka dhe konotacione përçmuese, ta dijë se ai po vijon të ngadhnjejë si biznes. I rrobave apo i këpucëe, ai vazhdon të tërheq shqiptarë të shumtë, që përfaqsojnë disa kategori shoqërore.
Ky treg vijon të jetë po aq aktiv sa në vitet e para të shfaqjes së tij në Shqipëri. Tregtia e rrobave të përdorura nuk ka humbur klientelë ndër vite, por e ka shtuar atë, për shumë arsye. Ky biznes është i shtrirë kudo, në çdo qytet, në çdo zonë urbane.
Po cilët janë blerësit në tezgat e këtyre tregjeve dhe ku ndohen ato?
Këtë realitet më mirë se kudo tjetër e lexon në Tiranë. “Filialet” e këtij biznesi në Tiranë janë të shtrirë në disa pika të përqendruara, ku në fushë të hapur e ku në ambiente të mbylluara, diku-diku edhe të mirëorganzuara.
Ndër pikat kryesore janë tregu i Stacionit të Trenit, ai te Parkun i Autobuzëve, në “Qytetin Nxënësi” dhe ai tek spitalet. Diferencën mes tyre e bën më së shumti ajo çka mund të quhet infrastrukturë e brendshme e tregut.
Malli që ofrohet i ekspozuar në ambient të mbyllur siç janë katet -0 të pallateve, ka çmimi më të lartë sesa ai i tezgave në ambiente të hapura. Nërsa cilësia është e të njëjtit standard. Klientela e këtij tregu mund të thuhet pa frikë se i përket gati çdo kategorie të shoqërisë.
Ajo çka dallohet më lehtë, është se ky mall blihet dhe përdoret nga cdo grupmoshë. Nëse janë femrat ato që dominojnë në radhët e klientelës, jo shumë pas mbeten meshkujt. Të imponuar nga buxheti i shtrënguar, të rinjtë përbëjnë fuqinë blerëse më të madhe në këtë treg. Por, duhet theksuar se kjo kategori blerësish janë dhe njohësit më të mirë të cilësisë së këtij malli.
Disa të rinj studentë të thonë se dy ose tre herë në muaj vijnë këtu gjatë orëve të lira të mësimit, duke përfituar edhe nga afërsia që ka shkolla me tregun. Ato pohojnë se më shumë se gjysma e rrobave që mbajnë veshur, janë blerë pikërisht në këtë treg.
Një vajzë, po ashtu studente, interesohet për një çantë shkolle. Varur në disa kangjella ka një larmi syresh me përbërje që nga ikiliti, imitacionet e lëkurës, e deri tek lëkura origjinale. Tashmë tregtarët, të cilët jo të gjithë i përkasin komunitetit rom, e njohin mjaft mirë mallin dhe përbërjen e tij, ndaj dhe çmimet i kategorizojnë mbi këtë bazë.
Dhe mund të thuhet pa mëdyshje se, disa vite më parë shqiptarët e blinin këtë mall vetëm nga nevoja për t`u veshur, ndërsa sot e blejnë këtë mall edhe për t`u veshur bukur, diku me drojë e diku pa drojë fare. /tesheshi.com/
