Lufta tregtare e imponuar nga Donald Trump është “një absurditet në këtë moment në jetën e planetit” pasi pengon luftën kundër varfërisë dhe ngrohjes globale, theksoi Emmanuel Macron nga podiumi i konferencës së Kombeve të Bashkuara mbi financimin e zhvillimit që po mbahet në Sevilje.
Pa përmendur Shtetet e Bashkuara dhe presidentin e tyre, Macron kritikoi kryesisht tarifat doganore të vendosura kundër “vendeve që janë gati të fillojnë ngritjen e tyre ekonomike”.
Ai shtoi se Organizata Botërore e Tregtisë duhet të ridizajnohet për t’u “përafruar me qëllimet tona në luftën kundër pabarazive dhe me qëllimet tona klimatike”.
“Megjithatë, ne duhet të rivendosim lirinë, drejtësinë në tregtinë ndërkombëtare, shumë më tepër sesa barrierat dhe tarifat që konsiderohen nga më të fuqishmit dhe që shpesh përdoren si mjete shantazhi, aspak si mjete ekuilibri”, u ankua presidenti francez.
Presidenti francez vuri në dukje se, përveç kësaj lufte tregtare, “tërheqja amerikane nga financimi” për zhvillimin “po ndikon në situatë”. Në veçanti, ai pranoi se “tensionet në financat publike” në shumë vende të pasura “kanë vendosur kufizime më të mëdha në aftësinë për të financuar solidaritetin ndërkombëtar”.
Ai edhe një herë mbështeti një reformë të sistemit financiar ndërkombëtar për të mundësuar që lufta kundër varfërisë dhe ngrohjes globale të kryhet njëkohësisht, një parim kyç në zemër të Paktit të tij për Progresin, Njerëzit dhe Planetin (Pacte pour le progress, les peuples et la planète /4P), i miratuar në Paris në vitin 2023 dhe në të cilin aktualisht marrin pjesë 73 vende. /tesheshi.com/
