Rikthehen “hakmarrjet” me shpërthime tritoli në Fushë-Krujë. Tre automjete janë dëmtuar, pasi persona ende të paidentifikuar hodhën një sasi eksplozivi pranë rrugës ku ishin parkuar disa automjete. Ngjarja ndodhi pasditen e së martës, në lagjen “Punëtori”. Fatmirësisht, sipas policisë nuk ka patur të lënduar në njerëz, por burime pranë ngjarjes pohojnë se banorët janë shprehur të frikësuar, si pasojë e shpërthimit të fuqishëm.
Dyshohet se autori ka qenë në një automjet në ecje, kur ka lëshuar lëndën plasëse, në vendin e ngjarjes.
Ky është shpërthimi i dytë i ndodhur në harkun kohorë të 24 orëve në rang qarku. Një natë më parë, një sasi tritoli rrezikoi jetën e zv/drejtorit të ALUIZNI-t në Durrës, Gerti Aleksi. Lënda plasëse ishte vendosur në automjetin e tij, që ishte parkuar pranë garazhit të pallatit, ku ai banon.
Fushë-Kruja është e njohur tashmë për serialet e ngjarjeve që kanë si motiv shpërthimet me lëndë eksplozivi, por fatkeqësisht shumë pak prej tyre janë zbardhur dhe identifikuar e arrestuar autorët përgjegjës./tesheshi.com
