Partitë kosovare po hedhim para të majme në fushatën zgjedhore, si në postera, reklama televizive, sponzorizime në rrjete sociale etj., të gjitha këto në kërkim të votës, pra ardhjes në pushtet.
Sipas organizatave joqeveritare “Demokraci Plus” dhe “Çohu”, koalicionet PDK- AAK-NISMA dhe koalicioni LDK- AKR – Alternativa janë shpenzuesit më të mëdhenj deri më tani.
“Në spotet televizive, PDK-AAK dhe Nisma kanë shpenzuar 17.300 euro, LDK-AKR- Alternativa kanë shpenzuar deri më tash 21.000 euro ndërsa VV 1.700 euro. Shpenzimet më të mëdha kanë shkuar deri më tash në lidhjet e drejtpërdrejta televizive”, tha Isuf Zejna nga “Demokraci Plus”, në një konferencë për media.
Ai gjithashtu tha se ditën e fundit të fushatës do të dalin me të gjetura edhe më të mëdha.
“Nuk mund të dalim me një shifër të përgjithshme. Fushata ndryshon shumë me fushatën e kaluar pasi kësaj here shpenzimet janë të fokusuara në media, sidomos ato digjitale”, tha ai.
Sigurisht deri ditën e premte kur përmbyllet fushata, partitë dhe kandidatët për deputetë do të hedhin akoma më shumë para, edhe pse nuk dihet burimi i tyre. /tesheshi.com/
