Në ditën e pestë të fushatës zgjedhore në Kosovë janë shfaqur problemet e para, ku shënjestër e sulmeve është Lëvizja Vetëvendosje.
Të dielën mbrëma në fshatin Studençan të Suharekës disa persona janë përpjekur të prishin tubimin e VV-së, për çka kjo e fundit ka drejtuar gishtin nga PDK, AAK e NISMA, siç e quan “koalicioni i territ”.
“Pasi që s’kanë mundur ta pengojnë tubimin ata janë larguar, e më vonë salla ku mbahej tubimi është sulmuar nga jashtë me një përzierje lëndësh shpërthyese. Fatmirësisht nuk pati asnjë dëmtim njerëzor. Ky gjest mjeran tregon parehatinë e ish-pushtetit përballë përparimit të pandalshëm të Lëvizjes. Ata po i tuten debateve, po i tuten ballafaqimeve politike, e tuta e tyre po shndërrohet në panik”, thuhet në reagimin e VV-së.
Incidenti i dytë ka ndodhur në bastionin e PDK-së në Skënderaj ku në qendër të këtij qyteti është shqyer posteri i fushatës zgjedhore të Veton Seferit, kandidatit për deputet nga VV.
Këto janë rastet e para të incidenteve në pak ditë fushatë në Kosovë. /tesheshi.com/
