Kancelari austriak, Werner Faymann, ka lajmëruar për masën më të fundit të qeverisë austriake, atë të pezullimit të përkohshëm të Shengenit.
Kancelari ka dhënë një intervistë për gazetën Oesterreich, ku ka shpjeguar se marrëveshja e Shengenit për kufij të hapur është përkohësisht e pezulluar në Austri.
“Çdokush që vjen tek ne do të kontrollohet me kujdes në kufi,” e ka bërë të qartë kancelari. “Gjithkush duhet të tregojë një kartë identiteti të vlefshme për autoritetet austriake në pikat e kontrollit kufitar.”
Ndërsa posaçërisht për refugjatët, kancelari austriak ka shtuar, “Të gjithë refugjatët duhet të kontrollohen, dhe emigrantët ekonomikë duhet të dërgohen në vendet e tyre të origjinës.”
Faymann e ka çuar më tej analizën dhe paralajmërimin për Shengenin, “Nëse BE-ja nuk ia del t’i sigurojë kufijtë e jashtëm, Shengeni si një i tërë është vënë në diskutim. Çdo vend duhet të kontrollojë kufijtë e tij kombëtarë.”
Austria nuk do t’i lejojë më as refugjatët që duan të kalojnë përmes kufijve të saj në vende të tjera. Në kufi është vendosur të dislokohet ushtria, për t’i ndaluar refugjatët që nuk kërkojnë të aplikojnë për azil në Austri, por thjesht synojnë ta shfrytëzojnë atë si një vendkalim për diku tjetër.
Një pjesë e vendeve nordike i kanë vendosur tashmë kontrollet në kufi, dhe dalëngadalë nismës së tyre po i bashkohen dhe shtete të tjera, çka do të thotë se shumë shpejt, nëse gjërat nuk marrin për mirë, lëvizja e lirë mund të mos jetë më e tillë në kufijtë e Europës. /tesheshi.com/
