Në Maqedoninë e Veriut skepticizmi ndaj Bashkimit Evropian është në rritje, dhe kërcënimi më i madh është Bullgaria, ndërsa Serbia shquhet si mikja më e madhe, sipas rezultateve të sondazhit të Eurometer, i cili u krye nga 12 deri më 27 dhjetor të vitit të kaluar.
Sipas këtij sondazhi, 72 për qind e të anketuarve besojnë se Maqedonia e Veriut po lëviz në drejtimin e gabuar.
Për sa i përket vlerave themelore shoqërore, 61 për qind e të anketuarve besojnë se nuk ka demokraci.
Skepticizmi në lidhje me hyrjen e Maqedonisë së Veriut në BE është rritur – 49 për qind pajtohen se anëtarësimi në Union është një gjë e mirë, krahasuar me 34 për qind që nuk mendojnë kështu.
“Ne kemi shifra rekord të ulëta sa i përket besimit dhe qëndrimit të qytetarëve të Maqedonisë ndaj BE-së dhe ndaj vetë procesit integrues. I pyetur se cili është qëndrimi i BE-së ndaj Maqedonisë së Veriut, 65 për qind besojnë se është i padrejt dhe shantazhues, ndërsa 17 për qind e atyre që besojnë se është i drejtë, që janë rënie dhe luhatje prej 20 për qind në krahasim me vitet e kaluara”, tha drejtori ekzekutiv i hulumtimit, Dimitar Nikolovski.
Shqetësimi për kërcënimet
Përveç kësaj, 29 për qind e të anketuarve besojnë se Maqedonia e Veriut nuk do të hyjë kurrë në BE, ndërsa në vitin 2021, kjo përqindje ishte 17 për qind.
Është rritur shqetësimi i qytetarëve nëse një shtet apo një organizatë ndërkombëtare përbën kërcënim për Maqedoninë e Veriut, ku 42 për qind e të anketuarve besojnë se ekziston kërcënim, ndërsa vitin e kaluar kështu kanë menduar 33 për qind e të anketuarve.
Bullgaria (27 për qind) dhe Rusia (4 për qind) përmenden si kërcënimet më të mëdha në listë.
Serbia konsiderohet mikja më e madhe me 37 për qind.
Edhe këtë vit qytetarët kanë besimin më të lartë në ushtri – 39 për qind.
Në vend të dytë janë institucionet fetare – 32 për qind, e ndjekur nga policia – 21 për qind.
Këtë vit qytetarët kanë besimin më të vogël në prokurori (7 për qind) dhe në drejtësi (7 për qind).
Të anketuarit kanë mendim negativ për luftën kundër korrupsionit në institucionet shtetërore në vend, me konkretisht 71 për qind që besojnë se institucionet janë të pasuksesshme në luftën kundër korrupsionit. /tesheshi.com/
