Ftesë për Trump-in nga një front lufte

Presidenti Volodymyr Zelensky i ka kërkuar Shteteve të Bashkuara të ofrojnë fonde shtesë për vendin e tij për të kundërshtuar Rusinë dhe ftoi ish-presidentin Donald Trump të vizitojë për të parë vetë shkallën e konfliktit.

Zelensky tha se ushtarët amerikanë mund të tërhiqen në një konflikt më të gjerë evropian me Rusinë nëse Uashingtoni nuk rrit mbështetjen e tij.

“Nëse Rusia na vret të gjithëve, vendet e NATO-s do të sulmojnë dhe pastaj ju do të dërgoni djemtë dhe vajzat tuaja”, u tha presidenti ukrainas amerikanëve në një intervistë për NBC.

Presidenti demokrat i SHBA Joe Biden i bëri thirrje Kongresit të miratojë legjislacionin shtesë për financimin, kryesisht për forcimin e mbrojtjes së Ukrainës, por edhe për ndihmën për Izraelin, rajonin Indo-Paqësor dhe forcimin e sigurisë kufitare.

Dhoma e Përfaqësuesve e udhëhequr nga republikanët në vend të kësaj miratoi një projektligj javën e kaluar që ofronte 14.3 miliardë dollarë ndihmë për Izraelin, por pa rritur ndihmën për Ukrainën. Duke folur për NBC, Zelensky ftoi ish-presidentin republikan Donald Trump të vizitojë Ukrainën dhe të mësojë për pasojat e agresionit rus.

Trump dëshiron të kthehet në Shtëpinë e Bardhë në zgjedhjet e vitit të ardhshëm dhe është favoriti kryesor i partisë së tij. Ai kritikoi ashpër ndihmën amerikane për Kievin, duke thënë se “ai mund t’i japë fund luftës në 24 orë nëse ai zgjidhet”.

“Nëse ai mund të vijë, do të më duhen 24 minuta për t’i shpjeguar se ai nuk mund ta menaxhojë këtë luftë,” tha Zelensky, duke shtuar:

“Nuk mund të çojë në paqe për shkak të Putinit.” /tesheshi.com/