Kreu i Federatës Shqiptare të Futbollit, Armando Duka, i ka përcjellë një letër-kërkesë gruas në krye të institucionit të akuzës, për t’u takuar e biseduar me të.
“Federata Shqiptare e futbollit, duke pasur si qëllim të përhershëm mbrojtjen e integritetit dhe reputacionit të futbollit shqiptarë, është gjithnjë në përpjekje për të luftuar fenomenet apo praktikat joetike që dëmtojnë imazhin e lojës së futbollit në përgjithësi. Fatkeqësisht, me mjetet e kufizuara në dispozicion të drejtësisë sportive, këto përpjekje nuk kanë qenë gjithnjë frytëdhënëse. Me vullnetin për të përmirësuar situatën aktuale, por edhe për të vendosur një urë konstante bashkëpunimi midis dy institucioneve tona, kërkojmë një takim për të ndarë me ju disa prej problematikave që FSHF has në aktivitetin e saj”, thuhet në letrën dërguar Arta Markut, raporton TCH.
Konkretisht nuk dihet ende se ku konsiston shqetësimi i Dukës, te trukimet apo incidentet, ndërkohë që vetë ai akuzohet jo pak si shndërrues i futbollit shqiptar në pazar. /tesheshi.com/
