Armando Duka mbetet sërish kreu i futbollit shqiptar duke marrë një tjetër mandat drejtimi. Gara që u duk se do ishte e tensionuar, ku afër vendit të organizimit të Asamblesë te Hotel Adriatiku në Durrës, janë instaluar dhe forca speciale, ka shkuar paq.
Duka e ka mundur me dy raunde atë që e bëri interesante këtë garë, Bashkim Finon. Ndërsa ky i fundit, edhe pse nuk ka arritur të marrë në dorë timonin e FSHF-së, ka arritur gjithsesi të mbajë karrigen e deputetit, pasi nuk preferoi ta dorëzonte mandatin politik gjatë hyrjes në garë.
Kandidimi i deputetit socialist u komentuar si një përpjekje e kamufluar e Ramës për të marrë kontrollin e FSHF-së, tani që vëllai i tij, Olsi Rama është bërë drejtor i Klubit Partizani, por kryeministri ka tentuar të qëndrojë larg garës duke u shprehur disa herë në publik se nuk e ndjek futbollin shqiptar.
Fino u konsiderua nga një pjesë e politikës dhe e medias, asaj afër opozitës, si përfaqsues i një klani pas së cilit qëndronin Presidenti i Partizanit, Gaz Demi e ai i Flamurtarit, Sinan Idrizi.
Duhet thënë se fitorja e sotme e Dukës, ia bën të trishtë këtë ditë deputetit Erjon Braçe, njeriut që e akuzon rregullisht atë si shkatërrues të futbollit shqiptar. /tesheshi.com/
