Ditën kur edhe emocionalisht shqiptarët po jetojnë nën atmosferën e Ditës së Pavarësisë, Federata Shqiptare e Futbollit ka vendosur që të sqarojë publikun se nuk po kërkon tjetër trajner për të zëvëndësuar italianin Panuçi. Kjo pas zërave se mund të ketë ndryshime në drejtimin e pankinës kuqezi.
“Nisur nga disa spekulime dhe lajme abuzive që kanë qarkulluar në disa media orët e fundit, Federata Shqiptare e Futbollin dëshiron t’iu informojë se nuk është aspak e vërtetë që jemi në kërkim të një trajneri të ri për Kombëtaren Shqiptare të Futbollit. FSHF është duke punuar dhe bashkëpunuar maksimalisht me trajnerin Panuçi për të arritur rezultate sa më të larta në kualifikueset për Kampionatin Europian 2020,” thuhet në një deklaratë të FSHF-së.
Reagimi vjen ndërsa edhe pas fitores në miqësoren me Uellsin, është përfolur që Panuçi mund të lëvizë. Vetë ky i fundit, kurrë nuk e ka çuar në mendje diçka të tillë. /tesheshi.com/
