Nga Bashkim Kastrati
Mund të duket çudi, por është e vërtetë, fshati i cili shtrihet pranë Liqenit të Batllaves, i cili furnizon pothuajse gjysmën e Kosovës me ujë të pijshëm, nuk mund ta shfrytëzojë këtë ujë për vete.
Ky është fshati Orllan i Komunës së Podujevës. Tokat e këtij fshati shtrihen në Liqenin e Batllaves. Ky fshat nuk ka fare kyçje në Ujësjellësin Rajonal, Prishtina.
Në lidhje me këtë çështje banorët e fshatit në fjalë kanë bërë kërkesa të shumta për t’u furnizuar me ujë të pijshëm nga ujësjellësi, por një gjë e tillë nuk është realizuar. Atyre iu duket e pakuptimtë, që jetojnë në afërsi të Liqenit dhe nuk kanë ujë të pijshëm.
Duke e marrë parasysh këtë situatë, banorët e këtij fshati do të organizojnë një protestë për të shprehur pakënaqësinë e tyre ndaj Komunës së Podujevës, e cila sipas tyre nuk ka ndërmarrë asgjë për të kyçur këtë fshat në Ujësjellësin Rajonal Prishtina.
Protesta do të mbahet në fshatin Orllan këtë të premte me 17 mars, duke filluar nga ora 13:00, ndërkaq marshimi protestues do të fillojë nga Xhamia e Orllanit deri te restorant “Liqeni”.
“Banorët nuk kanë ujë të pijshëm për shkak të neglizhencës së Komunës së Podujevës
Tesheshi.com ka biseduar me Rexhë Zekën njëri nga banorët e fshatit Orllan dhe njëri nga organizatorët e kësaj proteste.
Ai thotë se banorët e kësaj treve nuk kanë ujë për shkak të neglizhencës që është bërë nga Komuna e Podujevës, duke mos u angazhuar për të bashkëpunuar me institucionet tjera siç janë Ujësjellësi Rajonal Prishtina, apo ndonjë ministri që të ndajnë mjete për një projekt për t’i furnizuar banorët e këtij fshati me ujë të pijshëm.
“Fshati Orllani shtrihet pranë Liqenit të Batllaves, dhe nuk ka burime nëntokësore të ujit të pijshëm, por edhe ato pak burime që janë aty, pas analizave që janë bërë nga enti higjenik i Kosovës ka rezultuar të jetë ujë i kontaminuar dhe që mund të përdoret vetëm si ujë teknik. Mirëpo fatkeqësisht ne banorët e Orllanit e përdorim për ujë të pijshëm”, thotë Zeka.
Ai thotë se në vitin 2011 një grup qytetarësh të kësaj treve kanë formuar një këshill dhe e kanë ngritur këtë çështje, duke mbledhur mbi 400 nënshkrime nga banorët e këtij fshati, dhe bashkë me nënshkrimet kanë bashkëngjitur një kërkesë, e cila është dërguar tek nëntë institucione, ndër to edhe tek: Komuna e Podujevës, Ujësjellësi rajonal Prishtina, ministria e Mjedisit dhe Planifikimit Hapësinor etj. Por pavarësisht kësaj kërkese, nuk ka pasur asnjë përgjigje nga këto institucione.
“Me datën 25.02.2017 OJQ-ja “Sundimi i demokracisë në Kosovë” (SDK), e cila udhëhiqet nga nënkryetari i atij këshilli të qytetarëve, ka ftuar një tryezë me temën “Ndikimi i ujit të pijes në migrimin e banorëve të Orllanit dhe fshatrat për rreth kufirit”. Në këtë tryezë të ftuar kanë qenë zyrtarë nga Komuna e Podujevës në krye me kryetarin Agim Veliu , zyrtar nga Ministria e Mjedisit dhe Planifikimit Hapësinor (MMPH) dhe Ujësjellësi Rajonal Prishtina . Ftesës ju kanë përgjigjur MMPH në krye me zëvendësministrin Mendim Rugova, pjesëmarrës në tryezë ka qenë edhe drejtori teknik i ujësjellësit Rajonal Prishtina , mirëpo tryeza u bojkotua nga Agim Veliu”, thotë Zeka.
Ai thotë se gjatë këtij takimi, kanë gjetur bashkëpunim dhe gatishmëri nga zyrtari i ujësjellësit, po ashtu bashkëpunues ishte treguar edhe MMPH, mirëpo sipas tij pa bashkëpunimin e Komunës së Podujevës nuk mundet të shkohet tutje.
“OJQ-ja SDK i ka informuar qytetarët e kësaj ane rreth përmbajtjes së tryezës edhe me mbledhje publike edhe përmes faqes se vet në facebook . Qytetarët duke e parë që problemi po ngecë gjithmonë të Komuna e Podujevës kanë formuar një iniciativë qytetare për të bërë presion në formë proteste tek Komuna e Podujevës në krye me kryetarin Veliu që të jetë bashkëpunues me institucionet tjera për të siguruar një projekt për ujësjellës për këta banorë”, theksoi Zeka.
Ai thotë se kësaj radhe nuk do të ndalen duke protestuar, deri sa të merren masa konkrete për furnizimin e banorëve të këtij fshati me ujë të pijshëm.
“Nëse edhe mbas kësaj proteste nuk reflekton kryetari Agim Veliu, atëherë protestat do të vazhdojnë edhe pranë Komunës së Podujevës, sepse banorët e kësaj treve po ndihen shumë të anashkaluar nga komuna e tyre, qw nuk iu siguron elementin e dytë jetik që është uji i pijshëm. Edhe më ironik e bën ketë fakt kur kemi parasysh se Liqeni i cili furnizon mbi 600 mijë banorë të Kosovës me ujë të pijshëm shtrihet në tokat e këtyre banorëve”, u shpreh Zeka. /tesheshi.com/
