Në javën e tij të dytë, turneu i tenisit që zhvillohet në kryeqytetin francez hyn sot në fazën e tij më të nxehtë, duke nisur me çerekfinalet.
I dyti Grand Slam i vitit, që luhet në fusha me dhé të kuq, është më i dashur për Rafael Nadal-in, spanjollin i cili kërkon një trofe të dhjetë në këtë veprimtari.
Ai ndeshet sot pasdite në çerekfinale me një tjetër spanjoll, Carreno Busta, i njëzeti në renditje.
Po sot luhet dhe çerekfinalja mes serbit Djokovic dhe austriakut Thiem. Edhe pse ky i fundit shihet si një nga tenistët më premtues, ndaj ish-numrit një të botës ka një bilanc jopozitiv.
Fituesit e këtyre dy çerekfinaleve do të përcaktojnë dhe njërin prej çifteve gjysmëfinaliste; një përballje Nadal – Djokovic është e mundshme.
Dy çerekfinalet e tjera të meshkujve do të luhen të mërkurën.
Murray, numri një në botë, por me paraqitje jo të mira së fundi, do të ndeshet me Nishikori-n. Çifti tjetër çerekfinalist është Wawrinka – Cilic.
Te femrat, çerekfinalet që luhen sot e nesër janë këto: Mladenovic – Bacsinszky, Ostapenko – Wozniacki, Garcia – Pliskova dhe Svitolina – Halep. /tesheshi.com/
