Nga Bardha Nergjoni
Nuk është më shumë se 30 vjeç dhe ndoshta është njeriu më sportiv që njihni pasi çdo ditë ai vrapon dhe bën çiklizëm. Për 5 vjet ka vrapuar mesatarisht rreth 15 mijë kilometër. Njeh shumë mirë çdo zonë të gjelbër të Elbasanit dhe çdo majë mali të Shqipërisë por edhe më tej. Nuk është vetëm vrapues por edhe çiklist dhe alpinist. Ka qenë edhe mundës dikur. Ka përfunduar me sukses maratonën e Athinës dhe synon të përfundojë me fizikun e tij maratonën e Firences.
Pak e njohin por të gjithë ata që e shohin çdo ditë teksa vrapon apo “fluturon” me biçikletën e tij e admirojnë. Për mua Alfredi është njeriu më aktiv që njoh. Për miqtë e tij është një frymëzim se si mund ta duash sportin. Alfred Biqiku ka ngjitur shumë maja, ka vendosur të krijojë një ekip alpinistik për të kënaqur objektivat e ngjitjeve të rrezikshme dhe po kështu gjen gjithmonë shokë për të vazhduar në rrugën e tij të sportit të vrapimit dhe çiklizmit. Stërvitet në mënyrë autodidakte dhe mendon se do të vazhdojë çdo ditë, gjithmonë.
Si çdo mënjes vrapon dhe merr biçikletën e tij duke përshkuar kilometra të tëra pa u ndalur, pa u dorëzuar dhe me objektiva gjithmonë të qarta për t`u arritur. “Maratonomaku” ynë qesh kur e pyesim se deri ku do të vazhdojë, ndërsa veten e përshkruan me pak fjalë.
Kur keni filluar të merreni me sport?
Me sport kam filluar të merrem qysh i vogël. Jam angazhuar qysh herët në ekipin e mundjes së lirë greko-romake. Më pas u largova në emigracion dhe pata një shkëputje. Jam rikthyer plotësisht në sport me vrapimin dhe çiklizmin në moshën 25-vjeçare dhe vazhdoj çdo ditë.
Sa kilometra keni vrapuar në 5 vitet e fundit?
Është pak e vështirë të bësh një llogari, por nëse duhet atëherë kam vrapuar mesatarisht rreth 2100 km në një vit. Që i bie rreth 15 mijë kilometra në këto 5 vitet e fundit. por duhet të dini se unë shpesh e alternoj edhe me biçikletën.
Stërviteni vetë, ndryshe nga sportistë të tjerë. Pse keni zgjedhur kështu?
Vrapimi nuk është se ka shumë nevojë për trajner por më shumë me disiplinë. Unë vazhdoj të stërvitem vetë prej 5 vjetësh dhe ja kam dalë shumë mirë. Marr kryesisht programe nga interneti dhe sigurisht që teknologjia më ndihmon të vazhdoj.
Ju keni qenë pjesë e një ekipi alpinizmi por rreth një vit më parë e braktisët dhe krijuat një të ri. Pse?
Unë jam për sportin dhe, ekipi ku isha i angazhuar filloi të shndërrohej në një tjetër gjë duke patur si qëllim turizmin më shumë. Unë jam më tepër tek pjesa e sportit dhe për këtë arsye krijova një ekip timin me njerëz që merren kryesisht me sportin e ngjitjes, çiklizmit apo edhe vrapimit.
Një ndër qëllimet mesa shikoj janë edhe maratonat. Çfarë përgatitje do një maratonë?
Që të marrësh pjesë në një maratonë duhet një përgatitje e gjatë, e vazhdueshme. Jam i motivuar dhe stërvitem çdo ditë për të qenë pjesmarrës në një garë kaq të gjatë vrapimi. Maratona kërkon shumë këmbëngulje.
Pra stërvitesh çdo ditë të vitit. Po profesioni yt kush është?
Po, dal çdo ditë për vrap e për çiklizëm. Puna ime me të cilën jetoj është arredimi i ambienteve. Koha del për të gjitha nëse e programon. Mjafton dëshira dhe objektivi që i vendos vetes dhe më pas gjithçka është e arritshme.
Si vendose të marrës pjesë në maratona?
Rreth një vit më parë mora pjesë në maratonën e Athinës. Kam një lidhje me Greqinë ngaqë kam qëndruar për disa kohë. Pjesmarrja në vazhdim ishte vendim pas kësaj maratone. Më la shumë mbresa dhe do të vazhdoj të marr pjesë çdo vit derisa të kem fuqi. Është gjithashtu një rast i mirë për të parë shumë vende dhe njohur shumë njerëz.
Kush është intinerari që bëni çdo ditë?
Vrapoj ose pedaloj duke nisur nga Elbasani, Papërr, Cërrik, Tregan dhe e mbyll në Elbasan. Është rreth 40 kilometër. Nuk ka një kohë të përcaktuar pasi varet nga kushtet e motit. Nëse ka erë mund të shkojë edhe 4 orë.
Çfarë qëllimi ka pjesëmarrja në maratonën e Firences?
Në 29 nëntor organizohet maratona e Firences ku kam vendosur të jem garues. Qëllimi është të marrë pjesë e ta përfundoj me sukses. Sporti për mua është kënaqësi dhe kjo maratonë është argëtimi i radhës. /tesheshi.com/
