Gjobë dhe burg deri në tre vite parashikohet të jetë dënimi për ata që do ta përdorin frazën “kampet polake të vdekjes”.
Qeveria polake ka miratuar një dispozitë që parashikon dënimin deri me tre vite burg për përdoruesit e frazës “kampet polake të vdekjes” kur u referohen kampeve naziste në Poloni gjatë Luftës së Dytë Botërore.
Do duhet që nisma ligjore të marrë dhe miratimin e parlamentit, e po ashtu të dekretohet nga presidenti, por nuk duket të ketë pengesa në këtë drejtim.
Një njoftim i qeverisë polake thoshte mes të tjerash se, “Dispozitat e reja i penalizojnë këto terma fyes, që minojnë reputacionin e Polonisë.”
Varshava zyrtare ka qenë gjithmonë e ndjeshme ndaj përdorimit të kësaj fraze. Vijimësisht është kërkuar korrigjimi i përkufizimit “kampet polake të vdekjes” kur është folur për Aushvicin apo për kampet e tjera të ngritura nga nazistët në Poloni.
Me këtë frazë krijohet ideja se Polonia ishte përgjegjëse për Holokaustin, shprehet Varshava zyrtare, ndërsa, në të kundërt, qe një nga viktimat më të mëdha.
Kjo nismë ligjore synon t’i japë fund një shqetësimi të vazhdueshëm në Poloni, atij të referimit të kampeve naziste nga mediat e huaja si kampe polake. /tesheshi.com/
