Kampionati Europian nis sonte me takimin Francë – Rumani, të vlefshëm për grupin A. Ndeshja do të luhet në “Stade de France”, dhe do të gjykohet nga hungarezi Viktor Kassai. Në orën 21:00, ai do t’i bjerë bilbilit për fillimin e këtij aktiviteti të shumëpritur.
France 24 i ka kushtuar sot një reportazh grupit A, nën titullin, “Sa i rehatshëm është grupi i Francës?” Fillimisht kujtohet se Franca kërkon titullin e tretë në tokën e vet, pas suksesit në Euro 1984 dhe në Kupën e Botës së 1998-s. Në letër, thuhet në analizën e hollësishme, organizatorët janë në një nga grupet më të dobëta të turneut, por trajneri i francezëve, Didier Deschamps mendon se nuk ka “short të lehtë”.
Kur nis e flitet për kombëtaren shqiptare, sillet në vëmendje se lojtarët u quajtën heronj tetorin e vitit të shkuar, kur u u kualifikuan për herë të parë në një turne të madh. Në teori, pretendon France 24, Shqipëria nuk duhet të paraqesë asnjë kërcënim për Francën. Por, theksohet, ajo është kualifikuar në një grup ku gjendeshin Portugalia e Danimarka, e veç kësaj, e ka mundur Francën në një miqësore tamam një vit më parë.
Pasioni është fuqia e përfaqësueses shqiptare, vë në pah France 24. Trajneri De Biasi ka shtënë virtytet klasike italiane në ekip, duke përfshirë kujdesin, kohezionin dhe taktikat e stilit bunker. Lojtarët e Shqipërisë janë të vetëdijshëm, vijohet në analizë, se mbartin shpresat dhe aspiratat e një kombi që ka uri për suksese sportive, ndërsa mijëra tifozë nga diaspora e madhe shqiptare në Europë pritet të mblidhen në Francë për t’u dhënë shtysë “shqiponjave” për një lavdi të mëtejshme.
France 24 e vë gishtin te Lorik Cana si lojtari emblematik i Shqipërisë. 32-vjeçari karizmatik mishëron etikën e punës dhe fortësinë që e bën mbrojtjen e Shqipërisë aq të vështirë për t’u mposhtur.
Si pikë të dobët të përfaqësueses shqiptare, France 24 cilëson portierët, duke i mëshuar faktit se asnjë prej tyre nuk ka shumë përvojë në futbollin e nivelit të lartë. Veç kësaj, Berisha e ka kaluar më shumë në stol sezonin te Lacio.
Për Rumaninë, analiza çmon si pikë të fortë mbrojtjen, si dobësi, sulmin, e si lojtar kyç vlerëson Ciprian Tatarusanu-n, portierin 30-vjeçar të Fiorentinës.
Sa për Zvicrën, sipas France 24-ës, krahët janë pika e fortë, qendra e mbrojtjes është ajo e dobëta, e Xherdan Shaqiri është lojtari kyç. /tesheshi.com/
