Autoritetet franceze e kanë refuzuar një kërkesë për azil nga Julian Assange, themeluesi i të famshmit Wikileaks, me arsyetimin se ai nuk ndeshet me një “rrezik të atypëratyshëm”.
Në një letër të dërguar presidentit francez, e të botuar në gazetën Le Monde, themeluesi i Wikileaks-it e përshkruante veten si, “një gazetar të ndjekur e të kërcënuar me vdekje nga autoritetet e Shteteve të Bashkuara për shkak të aktiviteteve profesionale.”
Julian Asange shkruante në letër, “Jeta ime është në rrezik. Franca është i vetmi vend që mund të më japë mbrojtjen e nevojshme ndaj persekutimit politik me të cilin po përballem.”
Zyra e presidentit Hollande do të përgjigjej pak orë më vonë negativisht, duke mos e marrë në konsideratë kërkesën e tij.
Assange gjendet që prej tre vitesh i ngujuar në ambasadën e Ekuadorit në Londër, në përpjekje për të shmangur ekstradimin për në Suedi. Ai druhet se suedezët mund ta lënë në duart e amerikanëve, që do ta përcillnin menjëherë në SHBA, ku do t’i nënshtrohej gjykimit për publikimin nga Wikileaks-i të dokumenteve sekrete amerikane, diplomatike dhe ushtarake. /tesheshi.com/
