Shkencëtarët gjermanë kanë zbuluar gjurmë të pazakonta dinozauri, që mund të ketë peshuar rreth 30 ton, në një zonë krejt të braktisur në Saksoni, një zbulim që sipas tyre daton në 145 milionë vjet më parë.
“Është vërtet e pazakontë gjatësia e bishtit dhe është e habitshme kur mendon se sa mirë është ruajtur gjithçka, çdo gjurmë” tha udhëheqësi i gërmimeve Benjamin Englich, duke iu referuar edhe 90 gjurmëve të këmbëve, në një gjatësi prej 50 metrash. Diametri i secilës gjurmë, ishte 1.2 metra.
Englich dhe ekipi i tij i gjetën këto gjurmë teksa po gërmonin në një lagje pranë Hanoverit. Englich tha se gjurmët ngjasojnë me ato të një elefanti për nga madhësia dhe ato dyshohet se datojnë 135-145 milionë vjet më parë. Sipas tyre, bëhet fjalë për një dinozaur me qafë të gjatë dhe thonj gjithashtu.
“Këto gjurmë me siguri janë të një dinozauri, skeleti i të cilit ende nuk është gjetur” tha Englich. “Kjo do të thotë se bëhet fjalë për një specie që se kemi parë më parë në këtë epokë”.
Sipas ekipit të shkencëtarëve gjermanë, gjurmët pre-historike, nuk janë thjesht të mëdha por edhe në mënyrë të pazakontë, të thella, deri në 40 cm nën tokë, duke të dhënë idenë se bëhet fjalë për një krijesë që peshonte më shumë se 30 ton.
Ekspertët shpresojnë që thonjtë dhe përbërja e tyre të ndihmojë në zbulimin e detajeve të reja.
Gjurmët e dinozaurit më të madh, që janë zbuluar ndonjëherë, janë ato të zbuluara në 2009-ën në rajonin Jura të Francës, ku diametri i njërës gjurmë ishte 2 metra./tesheshi.com/
