Nga Donat Maloku
Data 10 qershor 2015 do të mbetet gjithmonë në histori. Kjo datë do të kujtohet çdo herë, pasi është një ngjarje e madhe për kombin shqiptar.
Heroi i kombit Isa Boletini u rivarros në vendlindjen e tij në Boletin.
Për tre ditë me radhë, në Prizren, Deçan, Prekaz, Prishtinë dhe së fundmi në Mitrovicë u nderua heroi Isa Boletini nga politikanë lokal dhe qytetarë të shumtë.
Manifesitmi qendror u mbajt në stadiumin “Adem Jashari”, në Mitrovicë ku qytetarë dhe disa zyrtarë institucional nderuan gjeneralin Isa Boletini.
Por, edhe kjo ceremoni si edhe shumë të tjera ishte jo e organizuar mire dhe e zbehtë.
Për të dëshmuar se kjo ceremoni nuk ishte në nivelin e duhur, dëshmon edhe fakti se presidentja e vendit Atifete Jahjaga nuk ishte e pranishme në Mitrovicë, për ta nderuar heroin shqiptar. Presidenca nuk ka dhënë ndonjë sqarim pse Jahjaga nuk ishte e pranishme në këtë ngjarje madhore për gjithë shqiptarët.
Në këtë ceremoni nuk mori pjesë as ish- kryeministri Hashim Thaçi, tani ministër i Jashtëm i Kosovës.
Ndryshe, për dallim nga Jahjaga dhe Thaçi, nga Shqipëria për të nderuar jetën dhe veprën e heroit nga Kosova, kishte ardhur presidenti Bujar Nishani, si dhe kryetari i Partisë Demokratike Lulzim Basha.
Por, si e shohin historianët por edhe analistët organizimin e ceremonisë për varrimin e eshtrave të Isa Boletinit?
Historiani Xheladin Shala duke kritikuar mëyrën se si është organizuar ceremonia për varrimin e Isa Boletinit ka thënë se ka qenë e rrugës që të ftohet edhe ndonjë prej historianëve në seancën solemne të Kuvendit për të folur për jetën dhe veprën e Isa Boletinit. “Për të folur për veprën e Isa Boletinit në seancën solemne por edhe në organizimin që është mbajtur në Mitrovicë është dashur të ftohet historiania Fatmira Musaj”, ka deklaruar Shala.
Historiani tjetër Selim Beziraj ka deklaruar për portalin “Te Sheshi”, se Isa Boletini e ka merituar një organizim më të mirë dhe të kishte më shumë qytetarë në organizimin qendror që u mbajt në Mitrovicë. “Është dashur të ishin prezent edhe studiues nga Evropa për të folur për figurën e Isa Boletinit”, ka deklaruar Beziraj.
Kurse, analisti Muharrem Nitaj thotë se është kompromentuar që në start procesi i rivarrosjes së eshtrave të Isa Boletinit. “Manifestimi në Mitrovicë ishte më shumë një improvizim se sa një ngjarje me protokoll e organizim shtetëror. Dukej keq që stadiumi ne Mitrovicë ishte gjysmë i zbrazët. E pakuptueshme që në këtë ceremoni mungonte presidentja apo zv,kryeministri i vendit (Hashim Thaçi). E vetmja gjë pozitive është se një personalitet i rëndësishëm është rivarrosur atje ku ka lindur, dhe që ka përfunduar procesi i rivarrimit që nuk dihej deri para dhjetë ditësh se ku do të bëhej”, ka deklaruar Nitaj për portalin “Te Sheshi”.
E pakënaqur me organizimet për Isa Boletinin është edhe këngëtarja e muzikës popullore , Shkurte Fejza e cila po ashtu nuk është ftuar me rastin e ceremonisë së varrimit të heroit të kombit, Isa Boletini. Ajo ka drejtuar disa akuza në drejtim të përgjegjësve të organizimit të sotëm në stadiumin “Adem Jashari” në Mitrovicë.
(tesheshi.com)
