Nga Donat Maloku
Korrupsioni në Kosovë është i pranishëm në të gjitha nivelet. Reformat në sundimin e ligjit, shihen kruciale për Kosovën, në aspiratat e saj drejt Bashkimit Evropian. Mesazhi i çdo diplomati të huaj që viziton Kosovën gjatë takimeve që zhvillon me përfaqësuesit e institucioneve është të luftohet korrupsioni dhe krimi i organizuar.
Kreu i Agjencisë Kundërkorrupsion, Hasan Preteni, ka thënë se për korrupsionin në Kosovë vazhdon të flitet shumë, të debatohet shumë, por hetohet pak, e nuk gjykohet fare.
Duke pasur parasysh deklaratën e Pretenit, kryeprokurorit të ri të shtetit i duhet të mos flasë shumë por të punojë fort në mënyrë që të korruptuarit të çohen prapa hekurave.
Megjithatë, kryeprokurori Aleksandër Lumezi ka dhënë fjalë të forta që në emërimin e tij në këtë pozitë duke thënë se se është i vendosur që ta luftojë krimin e organizuar, korrupsionin dhe terrorizmin.
Avokati Arianit Koci, në një prononcim për portalin “Te Sheshi”, ka thënë se luftimi i terrorizmit dhe korrupsionit është çështje shumë komplekse, dhe nuk duhen pritur rezultate të menjëhershme përkundër vullnetit që ka kryeprokurori i ri.
“Shtetet shumë edhe më stabile kanë vështirësi në luftimin e këtyre dukurive shkatërruese për shoqeri. Sistemi i ynë i drejtësisë është rrënuar sistematikisht me vite të tëra. Konsolidimi i tij, është proces afatgjatë. Çka është rrë me vite të tëra, nuk mund të ndërtohet shumë shpejtë. Me rëndësi është që në Gjyqësi të angazhohen sa më shumë profesionist. z. Lumezi e ka vullnetin që të bëjë ndryshime. Por, mos të presim instatnt rezultate. Për to, duhet kohë, guxim, profesionalizëm dhe patjeter vullnet politik dhe ndihmë prej të gjithë shoqërisë, në mënyrë që Prokuroria dhe Gjykatat, ta realizojnë misionin e vet”, ka deklaruar Koci.
Dren Doli, nga Instituti për Studime Juridike e Politike, në një prononcim për portalin ‘Te Sheshi’, ka thënë se qytetarët e Kosovës janë ngopur me deklaratat shterpe dhe zotime të vazhdueshme të funksionarëve publik.Ai shpreson që zotimet e kryeprokurorit Lumezi duhet të fillojnë që të marrin formën e punëve konkrete.
“Natyrisht, arsyeja pse në Kosovë kemi lidera politikë të korruptuar, të pasuruar pa mbulesë, dhe të paprekshëm nga ligji është pikërisht mungesa e vullnetit së pari të Prokurorëve dhe së dyti të Gjykatave për t’u marrë me raste të tilla. Këta të fundit duhet më në fund të gjejnë guximin që të shfrytëzojnë ligjin për të vënë para tij të gjithë qytetarët e Kosovës që i kundërvihen atij. Andaj, është në përgjegjësinë e z. Lumezi që të na provoj që besimi i dhënë në të nuk është i kotë”, ka deklaruar Doli.
Isuf Zejna, nga Instituti Demokratik i Kosovës (KDI), thotë se është shumë herët për të vlerësuar punën e kryeprokurorit të ri të shtetit Aleksandër Lumezi. Ai thotë se përveç anës deklarative është herët të flitet për ndryshim të kulturës së punës në Këshillin Prokurorial të Kosovës, institucion që e drejton Lumezi.
“Deri më tani prokurorët kosovar, nuk kanë pranuar të merren me rastet e korrupsionit dhe i janë shmangur të gjitha rasteve të ndjeshme. Për të pasur një qasje tjetër në këtë aspekt, nevojitet që z. Lumezi të ri organizoj institucionin për të ndryshuar së pari matjen e performancës së prokurorëve, në mënyrë që prokurorët të mos maten me numrin e rasteve të përfunduara, por ne vend të kësaj të matën me numrin e rasteve që kanë fituar dhe sasinë e pasurisë së paligjshme të konfiskuar. Gjithashtu nevojitet që të luftohet korrupsioni brenda vet institucionit të prokurorisë dhe të rritet besimi i publikut në këtë institucion. Në KDI besojmë se është shumë herët për të vlerësuar punën e z. Lumezi dhe për më tepër nuk duam të paragjykojmë rezultatet e punës, mirëpo mbesim të përkushtuar për të përcjell punën e këtij institucioni dhe veçanërisht në adresimin e rasteve të korrupsionit përmes prokurimit public”, ka deklaruar Zejna.
Korrupsioni s’luftohet fare
Kreu i Agjencisë Kundër Korrupsionit, Hasan Preteni, gjatë paraqitjeve mediale ka shprehur pakënaqësinë e tij me punën e gjyqtarëve sa i përket luftës kundër korrupsionit. “Për korrupsionin në Kosovë vazhdon të flitet shumë, të debatohet shumë, por hetohet pak, e nuk gjykohet fare”, kishte deklaruar Preteni në muajin prill të këtij viti gjatë prezantimit të raportit të AKK-së për vitin 2014-të.
Ndryshe, Organizata Transparency në Indeksin e perceptimit të Korrupsionit për vitin 2014, Kosovën e rendit në pozitën 110, sa i takon shkallës së korrupsionit./tesheshi.com/
