Në do të gjesh një përgjigje për pyetjen se cilat janë garat më të ndjekura të automobilizmit, është e thjeshtë fare: ato të Formulës 1!
Sezoni i ri ka nisur sot, për të përfunduar në nëntor, me të njëzetën garë. Ka nisur ndryshe, duke premtuar një rivalitet ndryshe. Nëse vitin e shkuar qe një konkurrencë kokë me kokë mes dy pilotëve të së njëjtës skuadër, Rosberg-ut dhe Hamilton-it, gara e sotme ka rikthyer në skenë gjermanin Sebastian Vettel, katër herë kampion bote, që me Ferrari-n e tij do të kërkojë të sfidojë britanikun e Mercedes-it e këdo tjetër.
Ngjan se ka ardhur momenti i Ferrari-t. Dhe jo më kot. Ndryshimet e shumta duket t’i kenë dhënë fund supremacisë së Mercedes-it, e veç kësaj, ulja e një gjermani në njëvendëshen e Ferrari-t medoemos duhet të japë rezultat, edhe pse nuk ka ndodhur kështu në sezonet e shkuara.
Nuk do kemi më vetëm një Mercedes që fiton; kjo është e sigurt! Ferrari ka hedhur dorezën e sfidës sot, Red Bull do të rritet gjithashtu në paraqitje, pa një, pa dy.
Fitorja e Vettel-it në Melburn është një lajm i mirë për të gjithë ata që duan të shohin një garë të vërtetë në Formula 1. Hamilton buzëqeshi sot pas garës, i rrahu krahët Vettel-it, por shpejt buzëqeshja e tij mund të zhduket nëse gjërat nuk shkojnë mbarë për të. Dhe kjo do të thotë më tepër spektakël në Formula 1!
Fotot e mëposhtme përcjellin tërë mrekullinë e një gare të Formulës 1. Ato i përkasin garës së kësaj të diele, në Melburnin e largët. /tesheshi.com/
