“Gjermania ka partinë AfD dhe Frauke Petry. Britania ka UKIP dhe Paul Nuttall. Italia ka Ligën e Veriut dhe Matteo Salvinin. Por, në politikën bashkëkohore europiane , mund të ketë vetëm një politikane të vërtetë ksenofobike. Sot, Marine Le Pen na kujtoi se vetëm ajo e mban këtë kurorë”. Kështu nis një artikull në “Foreign Policy” në raportim të lajmit se kryetarja e Frontit Nacional ka deklaruar se do t’i japë fund arsimimit pa pagesë për fëmijët e emigrantëve pa .
Deklarata e Le Pen erdhi gjatë një fjalimi të mbajtur në Paris ku ajo, mes të tjerash tha: “Nëse vjen në vendin tonë, mos prit që të kujdesen për ty, të kesh gjithçka, që fëmijët e tu të arsimohen falas”, duke shtuar: “Koha e lojës mbaroi”.
Më pas, ajo sqaroi se nuk kishte ndër mend të ndalonte të gjithë të huajt nga marrja e arsimimit – por vetëm ata që nuk janë të pajisur me dokumente. Ajo theksoi, sidoqoftë, se të gjithë të huajt që përdorin sistemin arsimor shtetëror duhet të jetojnë në Francë ligjërisht dhe të paguajnë taksat.
Arsimimi për të gjithë është i parashikuar në kushtetutën franceze.
“Ne do të rezervojmë përpjekjet tona dhe solidaritetin tonë kombëtar për më të dobëtit, më modestët dhe më të varfrit mes nesh”, tha ajo, duke përcaktuar një grup ku dukshëm nuk përfshihen fëmijët e emigrantëve pa dokumente.
Në vitin 2014, Le Pen gjithashtu, foli edhe kundër zëvendësimit të mishit të derrit me porcione të tjera ushqimore për studentët muslimanë dhe hebrenj në shkolla, duke thënë: “Nuk ka asnjë arsye që feja të hyjë në sferën publike”.
Dhe, në të vërtetë, fëmijët francezë të shkollave janë që tani, të ndaluar të veshin rroba me domethënie fetare apo simbolizëm fetar, dhe kjo është në fuqi prej vitit 20014. Në tetor të këtij viti, Le Pen tha se do ta shtrinte këtë ndalim në të gjitha vendet publike.
Le Pen pritet të përballet me kandidatin republikan, François Fillon në raundin e dytë të zgjedhjeve presidenciale franceze majin e vitit të ardhshëm. Fillon, i cili e ka shenjuar veten si “Theçeri francez”, gjithashtu ka paralajmëruar për rrezikun që “Islami radikal” përbën për vlerat e vendit.
Ndoshta edhe ai, gjithashtu, bën mirë të kujtojë se Marine Le Pen është vazhdimisht në zbulim të rrugëve të reja për ta bërë veten të dallueshme nga gjithë të tjerët, kur vjen puna për ksenofobinë.
Përgatiti: Juli Prifti – /tesheshi.com/
