Dy vite rrethim nga rebelët kanë përfunduar me shtënien në dorë të një baze ajrore të regjimit në Idlib, në provincën në veriperëndim të vendit. Pas muajve me përparime të dukshme, Fronti El Nusra ka arritur të marrë fortesën e fundit të Beshar Esadit në Idlib, bazën ajrore të Ebu el-Duhurit.
El Nusra lajmëroi të mërkurën se ka vrarë 100 forca qeveritare dhe ka zënë rob 60 të tjerë. Grupi ka shfrytëzuar stuhinë e rërës, ndërsa avionët e regjimit nuk mund të bombardonin aty ku duhej për shkak të mungesës së pamjes.
Sipas Rami Abdulrahmanit, drejtuesit të Obervatorit Sirian për të Drejtat e Njeriut, tanimë në Idlib nuk ka më trupa të ushtrisë siriane. Prania e vetme e regjimit haset vetëm në dy fshatra shiite, në Foa dhe Keferja, që janë të rrethuara dhe po mbrohen nga milicia.
Grupet rebele morën në mars nën kontroll qendrën e Idlibit, dhe që atëhere kanë bërë përparime të dukshme.
Televizioni shtetëror sirian e pranoi humbjen, duke njoftuar se trupat e ushtrisë siriane e kishin lënë bazën. “Pas luftimeve të ashpra në aeroportin e Ebu el-Duhurit, ushtria, e cila e mbrojti aeroportin me kurajë të madhe nën rrethim të plotë për më shumë se dy vjet, i braktisi pozicionet e saj.” /tesheshi.com/
