Pas sulmeve të djeshme në qendër të Xhakartës, ku humbën jetën shtatë persona, policia vendase ka arrestuar tre të dyshuar për lidhje me aktet e terrorit. Ata janë arrestuar në të gdhirë në Depok, në rrethinat e Xhakartës.
Veç gjashtë shpërthimeve, e shtatë të vrarëve, më së paku 20 të tjerë u plagosën kur pesë prej mësymësve hapën zjarr pranë një kafeneje Starbucks.
Përgjegjësinë për sulmet e djeshme e ka marrë ISIS-i përmes një njoftimi të enjten, ku pretendon se ka vrarë 15 persona. Në të vërtetë, raportimet për viktimat kanë qenë kontradiktore, çka është e kuptueshme në kësi ngjarjesh.
Shefi i policisë së Xhakartës deklaroi se kryerësit e sulmeve të djeshme ishin pjesë e një grupimi të udhëhequr nga Bahrum Naim, një mbështetës indonezian i ISIS-it që gjendet tanimë në Siri.
Indonezia ka përjetuar dhe më herët ngjarje të tilla, por ky është i pari i këtyre përmasave pas korrikut të 2009-ës, kur po ashtu shtatë persona patën humbur jetën prej sulmeve kamikaze. /tesheshi.com/
