Observatori Sirian për të Drejtat e Njeriut raporton për një prej humbjeve më të mëdha të kundërshtarëve të regjimit në Halep.
“Opozita ka humbur më shumë se një të tretën e zonës që kontrollonte në Halep gjatë përparimit të madh. Eshtë humbja më e madhe për opozitën në Halep që nga viti 2012,” deklaron Rami Abdel Rahman, drejtuesi i Observatorit.
Kryengritësit kanë humbur shumicën e lagjeve veriore në lindje të Halepit. Ushtria e regjimit të Beshar Esadit ka marrë lagjet Sahur, Hajdarije dhe Sheyh Hodr, ndërsa forcat kurde kanë marrë Shejh Farisin.
Sipas Al Jazeera-s, forcat kurde në Halep nuk janë të lidhura zyrtarisht me qeverinë e Damaskut, por kundërshtarët e regjimit i shohin si bashkëpunëtorë të Esadit.
Dy javë më parë ka nisur operacioni i forcave qeveritare siriane për të marrë lindjen e Halepit, të kontrolluar nga kryengritësit. Viktimat nga radhët e civilëve kanë qenë të shumta gjatë këtyre ditëve.
Kryengritësit kanë humbur më së paku që nga e shtuna 30 për qind të territorit në lindje të qytetit. /tesheshi.com/
