18 vjet paslufte ende nuk di për fatin e babait të tij. I pakënaqur me mënyrën si është trajtuar tema e të pagjeturve, thotë se nëse fiton besimin e qytetarëve për të hyrë në Kuvend, si ligjvënës do mundohet që kjo çështje të ketë një qasje të re, pra të pagjeturit të jenë kusht për bisedimet me Serbinë.
Është ky Andin Hoti, djali i veprimtarit të shquar Ukshin Hoti. Ai në një intervistë për tesheshi.com flet për brengat që po ja shprehin qytetarët në prag të fushatës zgjedhore, poashtu për të ashtuquajaturin “koalicioni i luftës”, për kandidatët për kryeministër, e tema tjera.
Intervistoi: Blendi Gashi
Pse vendosët të aktvizoheni në politikë? Pse pikërisht me PDK-në, për ç’farë arsye? Ju kërkoi Kadri Veseli? Pse nuk ju bashkuar ndonjë partie tjetër?
I kam hyrë politikës me bindjen se mundem dhe kam çfarë t’i jap asaj. Në qoftë se angazhimi im vlerësohet, dhe në fakt pritja e kandidaturës po më bind gjithnjë e më shumë, do të përkushtohem me tërë qenien për t’i përfaqësuar denjësisht qytetarët dhe interesat e vendit. Në PDK kam aderuar në vitin 2012 dhe ka disa vite që mbaj pozitën e zv.kryetarit të Rinisë Demokratike. E kam zgjedhur këtë parti sepse ajo përfaqëson proviniencën time, të familjes time. Kryetari Veseli ka ofruar hapësirë dhe mbështetje të parezervë për një rol aktiv të të rinjve në politikë dhe kjo më bën edhe më të përkushtuar në projektin e tij.
Ju tashmë jeni kandidat i PDK-së për deputet. Ç’kontribut mund të jepni nëse fitoni besimin e qytetarëve?
Nisur nga përvoja me të rinjtë e PDK-së fokusi i angazhimeve të mia do të mbetet rinia. Por, do të angazhohem pandalshëm në çështje jetike si të pagjeturit, në mënyrë që ajo të bëhet kusht për bisedimet me Serbinë. Mendoj se nuk mund të ketë sukses një proces i cili mban peng fate njerëzish, i cili nuk manifeston paraprakisht vullnetin për tema të tilla humane.
Babai juaj Ukshin Hoti, vazhdon të konsiderohet i zhdukur. A do jetë fokusi juaj në Kuvend pikërisht çështja e të pagjeturve?
Fati i babait tim dhe i të pagjeturve të tjerë është peng i një politike të paqartë dhe manipulative, e cila ka vazhduar ta lëndojë lirinë tonë. Padyshim se kjo do të ishte tema më e rëndësishme për karrierën time nëse marr mbështetjen e qytetarëve për të hyrë në Kuvend. Jam i bindur se përkushtimi për të pagjeturit do të reflektojë qasje të re politike për të gjithë procesin e shtetndërtimit.
Ju tashmë edhe pse jo zyrtarisht keni nisur fushatën, ku çdo ditë takoni qytetarë. Cilat janë brengat e tyre që ju shprehin më shumë?
Fenomeni i korrupsionit duket se e ka dëmtuar shumë besimin e qytetarëve në institucione, besimin e tyre te politika dhe jam i bindur se kjo është brenga më e madhe. Patjetër se gjendja jo e mirë ekonomike si pasojë e papunësisë së lartë është problem, por kam përshtypjen se njerëzit janë më të revoltuar ndaj politikanëve dhe zyrtarëve abuzues, të cilët kanë shkaktuar zhgënjim dhe humbje të shpresës. Ne duhet ta ndryshojmë këtë realitet të hidhur, duhet t’i krijojmë perspektivë të rinjve, përndryshe pse të krenohemi që kemi shtet.
Si e keni parë ndërtimin e koalicionit parazgjedhor PDK, AAK, NISMA? A besoni se do të fitojë zgjedhjet?
Fitorja nuk diskutohet, sepse “Fillimi i Ri” është pikërisht ajo që i duhet sot vendit. Koalicioni veçsa e ka përforcuar këtë dhe e ka bërë më të sigurtë fuqinë e ndryshimeve pozitive. Vlerësimin për koalicionin e kam shprehur që në ditën e parë, por edhe pas kandidimit tim. Vlera më e madhe e këtij koalicioni nuk është vota, është unifikimi i faktorit politik që ka dalë nga lufta e UÇK-së.
Tre kandidatë janë në garë për kryeministër. A mund të thoni mendimin tuaj për Haradinajn, Hotin dhe Kurtin?
Më lejoni të shprehem me respekt për të tre, por unë besoj në kandidaturën që ka mbështetur partia ime.
Si pritni të shkojë fushata zgjedhore dhe dita e zgjedhjeve?
Uroj dhe besoj që gjithçka të shkojë mirë, me qetësinë e nevojshme dhe respektin për njëri tjetrin si kundërshtarë. Ne tashmë kemi dëshmuar kulturë të lartë zgjedhore dhe suksesin e arritur me standardin e zgjedhjeve të kaluara do të dëshiroja ta avancojmë edhe më shumë. Jam prej atyre që besojnë se Ballkani mund të bëhet Evropë.
Për fund, cili është mesazhi juaj për partitë në përgjithësi dhe qytetarët në prag të zgjedhjeve?
Të konkurrojmë mes vete me ide dhe vlera, të rivalizojmë njëri tjetrin por jo të luftojmë kundër njëri tjetrit, të përpiqemi për fitore por ta pranojmë me dinjitet vullnetin e qytetarëve. Kjo është demokracia dhe kjo është e bukura e pluralizmit politik. Do të dëshiroja që qytetarët t’i ndihmojnë demokracisë, e para duke votuar masivisht dhe me bindjen e tyre të lirë, por edhe duke e çmuar vlerën që ka vota e tyre. Sa më shumë rëndësi që ata i kushtojnë votës së tyre më 11 qershor, aq më cilësore dhe efektive do të jetë politika pas 11 qershorit. /tesheshi.com/
