Një zjarr shkrumboi ish-konsullatën italiane në Sarandë, një godinë karakteristike në rrënim prej vitesh, pronë shtetërore, e cila nuk u trajtua kurrë këto vite, edhe pse në teori thuhej se mund të jepej me koncension për 20 vite te privati. Por as kjo nuk ndodhi, derisa flakët e përpinë.
Auron Tare, njohës i historisë së Sarandës, sidomos rrënjëve italiane të saj, tha se u ndodh rastësisht aty dhe pa tek zhdukej nën flakë një monument i së kaluarës.
“Unë aty isha e pashë me shumë dhimdje. Aty ka qenë një godinë ku bëheshin ballot në Sarandë. Kanë shërbyer konsujt shumë intersantë që kanë lënë shënimet e tyre. Aty Konti Ciano (Galeazzo Ciano) foli për popullin e Sarandës. Ajo godinë ka parë zbarkimin e ushtrisë italiane në 1939. Nga ballkoni në kohën e monarkisë dhe vizitës së Zogut janë bërë deklarata publike. Ishte një godinë shumë e bukur, jo vetëm nga pikëpamja historike por dhe e kulturës. Ishte një xhevahir i Sarandës që ishte lënë ashtu prej vitesh duke degraduar”, tha Tare.
“Është skenë e vrasjes së një monumenti historik që nuk kishte as status mbrojtës as nga Bashkia e as Qeveria”, theksoi ai.
Siç tha ai, “ky është fundi i një periudhe historike që duhet thënë që është shkatërruar në mënyrë të sukseshme nga vetë shqiptarët. Të gjitha godinat historike të Sarandës janë prishur nga ‘12-ta e këtej. Janë prishur nga neglizhenca, injoranca”. /tesheshi.com/
