Ish-presidenti amerikan Donald Trump e quajti pasardhësin e tij, Joe Biden, një “armik të shtetit” përpara mbështetësve të tij, duke denoncuar gjithashtu kontrollin e FBI-së në shtëpinë e tij në Florida, gjatë një aktiviteti të fushatës përpara zgjedhjeve afatmesme të së shtunës mbrëma në Pensilvani.
“Ky është armiku i shtetit,” shpërtheu Trump turmës, duke iu përgjigjur një sulmi të ashpër nga Presidenti Biden, i cili dy ditë më parë tha se republikani dhe pasuesit e tij përfaqësonin “një ekstremizëm që kërcënon vetë themelet e demokracisë sonë”.
Fjalimi i tij” nuk ishte gjë tjetër veçse një manifestim “urrejtjeje dhe zemërimi”, gjykoi Donald Trump, duke akuzuar Biden se i quajti ndjekësit e tij “një kërcënim për demokracinë” dhe “armiq të shtetit”.
“Armiku i shtetit është ai dhe grupi që e kontrollon”, vazhdoi ish-presidenti, duke folur në shtetin kyç në zgjedhjet afatmesme të 8 nëntorit, kur do të vendoset se cila parti kontrollon të dyja dhomat e Kongresit amerikan.
Në paraqitjen e tij të parë publike që nga kontrolli i policisë federale në shtëpinë e tij në Mar-a-Lago, Florida, më 8 gusht, Trump tha se operacioni ishte “shembulli më flagrant i kërcënimeve shumë reale ndaj lirisë së amerikanëve dhe një nga abuzimet më tronditëse të pushtetit nga çdo administratë në historinë amerikane”.
Ish-presidenti këmbënguli se “bastisja e dënueshme” në “shtëpinë time në Mar-a-Lago” ishte një “travesti e drejtësisë” pasi ai synon më hapurnjë tjetër kandidim për Shtëpinë e Bardhë në 2024.
Byroja Federale e Hetimit e kreu bastisjen sepse dyshonte se ish-presidenti mbante në mënyrë të paligjshme dokumente konfidenciale dhe të klasifikuara nga koha e tij në Shtëpinë e Bardhë (2017-2021). Sipas një dokumenti të Departamentit të Drejtësisë, oficerët e policisë federale vlerësojnë se brenda rreth tridhjetë kutive të sekuestruara kishte dokumente tepër sekrete që “mund të jenë fshehur” për të penguar hetimin. /tesheshi.com/
