Kreu i një prej dy gjysmave të PD-së, gjithsesi i asaj zyrtare prej posedimit të vulës me vendim gjykate, Lulzim Basha, komentoi arrestin e shtëpisë së ish-babait të tij politik, Berishës, i pari deklarim i tij ky lidhur me këtë aspekt të nxehtë e të jashtëzakonshëm politik.
“Kam dy reagime: njëri në rrafshin personal, tjetri është në rrafshin zyrtar. Në rrafshin personal më vjen
shumë keq që një njeri që kam bashkëpunuar me një kohë të gjatë që padyshim ka dhënë kontributet e veta për vendin të përfundojë këtu. Është vetë përgjegjës për zgjedhjen që ka bërë. Kjo është njëra anë e kostos që sjellja e tij i solli të gjithëve. Kjo është kosto që i ka dhënë familjes së tij, por padyshim që i ka dhënë një kosto të thellë PD-së.
Nga ana tjetër është e domosdoshme që opozita dhe PD të ecin përpara. Përgjigja zyrtare është se në çdo rast, qëndrimi i PD-së është që drejtësi duhet të bëjë punën e saj të papenguar dhe çdo kush duhet të jetë në dispozicion të drejtësisë. Për këtë arsye kam çuar në Parlament dhe heqjen përfundimtare të imunitetit”, tha Basha, dalë para medias pas shumë kohe heshtjeje.
Basha gjithashtu këmbënguli se ai është kryetar i PD-së, referuar verdikteve institucionale e jo realitetit emipirik opozitar, në të cilin gjithsesi nuk është mazhorancë në raport me PD-në e Berishës. “Nuk e kam thënë unë që jam kryetar i PD-së, e thotë KQZ-ja, gjykata, institucionet e shtetit shqiptar dhe institucionet ndërkombëtare ku Partia Demokratike bën pjesë. Unë padiskutim jam kryetar i zgjedhur një anëtar një votë më 29 korrik”. /tesheshi.com/
