Presidenti rus Vladimir Putin priti udhëheqësit e Armenisë dhe Azerbajxhanit, në takimin e parë që nga nënshkrimi i armëpushimit me ndërmjetësimin e Rusisë, i cili i dha fund konfliktit në rajonin e Nago-Karabakut.
Në një takim me presidentin e Azerbajxhanit Ilham Aliyev dhe kryeministrin armen Nikolla Pashinian, Putini tha se marrëveshja e paqes po zbatohej me sukses dhe se ishte krijuar baza e nevojshme për një zgjidhje afatgjatë dhe gjithëpërfshirëse të konfliktit të Nago-Karabak.
Putini njoftoi sot se zyrtarë të lartë nga Armenia, Azerbajxhani dhe Rusia do të krijojnë një grup pune për të diskutuar hapat e mëtejshëm për të rivendosur lidhjet e trafikut në rajon.
Marrëveshja e paqes, e datuar 10 nëntor të vitit të kaluar, i dha fund konfliktit 44-ditor në të cilin ushtria Azerbajxhanase u shkaktoi humbje të mëdha forcave armene dhe rifitoi kontrollin e pjesëve të mëdha të Nago-Karabakut dhe zonave përreth.
Sipas marrëveshjes së paqes, Rusia ka vendosur rreth 2,000 paqeruajtës në Nago-Karabak për të paktën pesë vjet.
Marrëveshja e paqes u festua në Azerbajxhan si një fitore e madhe, por ajo provokoi zemërim dhe protesta masive në Armeni, ku mijëra njerëz kërkuan dorëheqjen e Pashinianit.
Një numër i madh demonstruesish sot u përpoqën të bllokonin autostradën që lidh kryeqytetin armen Jerevanin me aeroportin në mënyrë që të parandalonin që Pashinian të udhëtonte në Moskë, por policia i shpërndau ata.
Kryeministri armen e quajti marrëveshjen “një hap të dhimbshëm, por të domosdoshëm për të parandaluar pushtimin azerbajxhanas të të gjithë Nago-Karabakut”.
Azerbajxhani dhe aleati i saj Turqia kanë mbyllur kufijtë e tyre me Armeninë që nga shpërthimi i konfliktit të Nago-Karabakut në 1993, i cili ka dobësuar ekonominë e vendit pa dalje në det.
Marrëveshja e paqes parashikon rihapjen e rrugëve të transportit, duke përfshirë një korridor që lidh Azerbajxhanin me eksklavën e tij Nakhchivan, e cila kufizohet me Armeninë, Turqinë dhe Iranin. /tesheshi.com/
