Kreu i diplomacisë finlandeze, Pekka Haavisto, nënshkroi të martën në selinë e Aleancës së Atlantikut të Veriut në Bruksel dokumentin për anëtarësimin e vendit në NATO.
Flamuri finlandez u ngrit me ceremoni në selinë qendrore të aleancës më të madhe ushtarake në botë në Bruksel, pothuajse një vit pasi Helsinki aplikoi për anëtarësim.
Haavisto përfundoi procesin e anëtarësimit duke ia dorëzuar dokumentin zyrtar Sekretarit të Shtetit të SHBA Antony Blinken, pasi Departamenti Amerikan i Shtetit është përgjegjës për dokumentet e anëtarësimit.
Pas kësaj, Finlanda u bë zyrtarisht anëtari i 31-të i plotë i aleancës ushtarake.
Haavisto tha se akti i nënshkrimit ishte “historik”.
Ai tha se përfaqësuesit turq në NATO njëkohësisht i kanë dorëzuar Blinken-it dokumentet për ratifikimin e anëtarësimit të Finlandës në NATO.
Presidenti finlandez Sauli Niinisto tha se hyrja e Finlandës në NATO nuk është e drejtuar kundër asnjë vendi.
Niinisto: Sigurimi dhe mbrojtja e territorit tonë
“Anëtarësimi i Finlandës në NATO nuk ndryshon themelet dhe qëllimet e politikës së jashtme dhe të sigurisë së Finlandës”, tha ai në një deklaratë të postuar në Tëitter.
Ai tha se Finlanda është një vend nordik i qëndrueshëm dhe i parashikueshëm, i cili përpiqet për një zgjidhje paqësore të mosmarrëveshjeve.
Kontributi më domethënës i Finlandës në parandalimin dhe mbrojtjen e përbashkët të NATO-s do të jetë në sigurimin dhe mbrojtjen e territorit tonë, tha Niinisto.
Finlanda, së bashku me Suedinë, aplikuan për anëtarësim në NATO në maj të vitit 2022, pas pushtimit të Rusisë në Ukrainë, por aplikimi i saj u kundërshtua nga Ankaraja, si dhe hyrja e Suedisë.
Turqia vazhdon të bllokojë ofertën e Suedisë për anëtarësim, për një numër çështjesh të diskutueshme, duke përfshirë shqetësimet e Ankarasë për atë që ajo thotë se është mungesa e bashkëpunimit në luftën kundër terrorizmit.
Anëtarët e NATO-s duhet të bien dakord unanimisht për të pranuar vende të reja.
Pas muajsh bisedimesh të ndërmjetësuara nga aleanca, Turqia përfundimisht votoi për pranimin e Finlandës në NATO javën e kaluar, por ende nuk ka mbajtur një votim për Suedinë.
Hungaria dhe Turqia nuk e kanë ratifikuar anëtarësimin e Suedisë
Ceremonia e pranimit të Finlandës do të shoqërohet nga një takim i Komisionit NATO-Ukrainë, një forum i nivelit të lartë për ministrat e Aleancës për të diskutuar bashkëpunimin me Kievin.
Ministri i Jashtëm ukrainas Dmytro Kuleba gjithashtu do të marrë pjesë.
Mbledhja e Komisionit NATO-Ukrainë po mbahet për shkak të kundërshtimit të Hungarisë.
Budapesti akuzoi Ukrainën se nuk respekton të drejtat e gjuhës hungareze dhe të pakicës etnike në vend.
Hungaria, ashtu si Turqia, nuk e ka ratifikuar ende anëtarësimin e Suedisë në NATO, për shkak të mosmarrëveshjes mbi fondet buxhetore të BE-së.
Faktori rus për anëtarësimin e ri
Deri pak kohë më parë, Finlanda qe një vend neutral, pra pa rreshtim ne blloqe gjeopolitike. Por pas agresionit rus kundër Ukrainës, u ndje e kërcënuar nga Moska dhe vendosi që të hyjë në NATO, si një formë mbrojtjeje.
Ky vend nordik ka bërë luftra me Rusinë, pasi kjo e fundit ka një ambicie historike ndaj tij, ndaj dhe Finlanda pa te Ukraina një fat të mundshëm dhe vendosi menjëherë që të rreshtohet në Aleancën Veriatlantike. /tesheshi.com/
