Portugali – Francë, finalja e kësaj të diele në Euro 2016, do të zhvillohet nën arbitrimin e Mark Clattenburg-ut.
Bëhet fjalë për të njëjtin gjyqtar që gjykoi javë më parë finalen e Champions League-s, mes dy skuadrave të Madridit, Realit dhe Atletikos. Clattenburg ka arbitruar gjithashtu brenda kësaj periudhe dhe finalen e FA Cup-it në Angli, midis Mançester Junajtedit dhe Kristëll Pallasit.
Ai ishte përzgjedhur midis tre emrave pretendentë, por qe me fat pas eliminimit të Uellsit nga Portugalia në gjysmëfinale. Përndryshe, nëse Uellsi do të ishte kualifikuar, për 41-vjeçarin do të kishte qenë e pamundur të zgjidhej për të gjykuar finalen.
Zvicra ndaj Polonisë ka qenë takimi i fundit i arbitruar prej tij në këtë Europian. Dy ndeshje të tjera, në fazën në grupe, janë zhvilluar nën gjykimin e Mark Clattenburg-ut, Belgjikë – Itali dhe Kroaci – Çeki.
Kjo do të jetë hera e parë prej vitit 1964 që një finale e Europianit do të gjykohet nga një anglez. /tesheshi.com/
