Një listë me dhjetë emrat e kandidatëve për të fituar çmimin e trajnerit më të mirë të vitit është bërë e njohur sot nga organi qeverisës i futbollit botëror.
Eshtë në këtë listë Fernando Santos, trajneri i Portugalisë, që u shpall kampione në Euro 2016. Nuk mungon në të dhe italiani Claudio Ranieri, tekniku që me Lestër Sitin bëri surprizën më të madhe të vitit, duke e nxjerrë atë kampion të Premier League-s në sezonin e shkuar.
Trajneri i Uellsit, Chris Coleman, është mes kandidatëve, siç është dhe Didier Deschamps, tekniku i Francës.
Nuk mungojnë dy trajnerët e ekipeve të Madridit, Zinedine Zidane dhe Diego Simeone. Luis Enrique dhe Pep Guardiola janë të pranishëm gjithashtu pas sukseseve në klubet e tyre.
Jurgen Klopp dhe Mauricio Pochettino, përkatësisht teknikët e Liverpulit dhe Totenhemit, plotësojnë dhjetëshen e kandidatëve.
Një listë e reduktuar në tre emra do të publikohet më 2 dhjetor, kurse fituesi do të njihet me çmimin më 9 janar.
Fituesi i çmimit ka për t’u zgjedhur nëpërmjet një procesi votimi të kombinuar. Në masën 50 për qind do të merren në konsideratë zgjedhjet e trajnerëve dhe të kapitenëve të ekipeve kombëtare, e gjysma tjetër do të ndahet mes rezultateve të një votimi publik online dhe opinioneve prej një grupi të zgjedhur nga mbi 200 përfaqësues të medias në të tëra kontinentet. /tesheshi.com/
