Human Rights Watch i ka kërkuar organizmit më të lartë botëror të futbollit të mos i lejojë ekipet izraelite të luajnë në “tokën e vjedhur”, në Bregun Perëndimor të pushtuar, por t’i zhvendosë ato në Izrael.
Në një raport të kësaj organizate thuhet se ekipe izraelite të ngulimeve po luanin “në tokën e marrë në mënyrë të paligjshme nga palestinezët”.
Sari Bashi, drejtuesja e Human Rights Watch-it për territoret izraelite dhe palestineze thotë se, “Duke i lënë ndeshjet të luhen në tokë të vjedhur, FIFA po e njollos lojën e bukur të futbollit.”
Sipas saj, organizmi i botëror i futbollit duhet t’i kërkojë Federatës Izraelite të Futbollit t’i zhvendosë brenda Izraelit të gjitha ndeshjet dhe aktivitetet e sanksionuara nga FIFA.
Ndërsa ngulimet konsiderohen ilegale sipas ligjit ndërkombëtar, gjashtë ekipet e përmendura në raport janë të vogla.
Jibril Rajoub, kreu i Federatës Palestineze të Futbollit, mendon se klubet në ngulimet ilegale duhen ndaluar, e se Izraeli duhet bërë përgjegjës.
“Eshtë koha që Izraelit t’i nxirret një karton i kuq, sepse nuk respekton ligjet ndërkombëtare apo të FIFA-s,” ka thënë ai.
Federata Palestineze e Futbollit është ankuar prej kohësh se Izraeli ia pengon aktivitetet.
66 ligjvënës të Parlamentit Europian nënshkruan më herët gjatë këtij muaji një letër për presidentin e FIFA-s, Gianni Infantino, duke i kërkuar që ta ngrejë çështjen e futbollit të ngulimeve në takimet e këtij organizmi që do të mbahen në muajin e ardhshëm. /tesheshi.com/
