Arabia Saudite është përzgjedhur për të pritur Kupën e Botës për Klube në vitin 2023, njoftoi Federata Ndërkombëtare e Futbollit (FIFA).
Vendimi i Këshillit të FIFA-s është marrë vetëm pak ditë pasi turneu i sivjetmë përfundoi në Marok dhe në finale kampioni i Evropës Real Madrid mposhti me rezultat 5:3 përfaqësuesen aziatike Al Hilal nga Arabia Saudite.
Arabia Saudite do të presë turneun në vitin 2023. Turneu do të mbahet nga 12 deri më 22 dhjetor, dhe Kupa e Botës për Klube do të ketë edhe një herë shtatë ekipe – gjashtë kampionë kontinental plus kampionin pritës.
Këshilli konfirmoi gjithashtu ndryshimet në strukturën e Kampionatit Botëror të Klubeve, me miratimin për zgjerimin e turneut në 32 ekipe nga viti 2025. Europa do të merr 12 vende, Amerika e Jugut gjashtë, ndërsa Afrika, Azia, Amerika Veriore dhe Qendrore dhe Karaibet do të kenë secila nga katër përfaqësues. Një vend është i rezervuar për Oqeaninë dhe tjetri për vendin organizator.
FIFA gjithashtu ka konfirmuar se të tre organizatorët e Kupës së Botës 2026, përkatësisht SHBA-ja, Kanadaja dhe Meksika, do të kualifikohen drejtpërdrejt në Kupën e Botës.
Për shkak të kësaj, tre vende do të zbriten nga kuota CONCACAF. Kështu, tre vende të tjera kualifikuese për Kupën e Botës do të jenë në dispozicion nga ajo konfederatë. Rikujtohet se për herë të parë në Botërorin 2026 do të marrin pjesë 48 kombëtare.
Këshilli i FIFA-s miratoi gjithashtu Raportin Vjetor 2022, i cili rendit një të ardhur rekord prej 7.6 miliardë dollarësh gjatë ciklit 2019-2022. dhe 11 miliardë dollarë që priten gjatë tre viteve të ardhshme.
“Investimi i paprecedentë i FIFA-s në futboll është rezultat i transparencës sonë solide financiare dhe është një shembull konkret se si duam ta bëjmë futbollin vërtetë global”, tha presidenti i FIFA-s, Gianni Infantino.
“Suksesi i jashtëzakonshëm i Kupës së Botës FIFA 2022 në Katar ka qenë kritik për aftësinë e organizatës për të përmbushur misionin e saj ndaj shoqatave tona anëtare dhe botës së futbollit, pavarësisht sfidave të shumta me të cilat jemi përballur gjatë ciklit të kaluar”, ai shtoi. /tesheshi.com/
