Luis Hamilton është thuajse kampion i botës për pilotë edhe këtë sezon të Formula 1.
Britaniku i Mercedes ka fituar edhe garën e Suzukës në Japoni, në një kohë kur rivali i tij për titull, Vetel i Ferrarit, ka lënë garën që pas xhiros së pestë, pasi makina ka dhënë defekt.
Në këtë mënyrë, me 59 pikë më tepër se gjermani, e me 4 gara të mbetura deri në mbyllje të sezonit, Hamilton vetëm matematikisht nuk është kampion për herë të katërt në këtë sport. Gara e Japonisë ka nisur shumë mirë për Hamilton që nisej i pari, me Vetel pas tij. Por gjermani ka ndjerë se dicka nuk shkonte me motorrin e tij, e pas fare pak xhirosh, është detyruar të braktisë garën.
Hamilton e udhëhoqi këtë garë që nga fillimi, e vetëm për momente të shkurtra, ka ndjerë ndonjë “pickim” rivaliteti nga ndjekësi i tij, Maks Verstapen. Holandezi dhe shoku i tij i skuadrës tek Red Bull, Riçardo, kanë plotësuar podiumin e Suzukës, duke dëshmuar se makina e tyre ka ngritje konstante, e se mund të jetë konkurente për “të mëdhatë” Mercedes e Ferrari, sezonin tjetër.
Ndërkohë në kampin e “kokëkuqes” Ferrari, një tjetër zhgënjim, pas një tjetër sezoni, edhe pse pretenduan se makina po zhvillohej ndjeshëm. Kësaj rradhe, skuderia italiane “tradhëtoi” veten dhe pilotin e saj pretendent Vetel, e nuk i mbetet që tjetër, vecse të provojë përsëri…sezonin tjetër. /tesheshi.com/
