“Eshtë një nga ditët e mia më të këqija si futbollist.” Kështu e ka përshkruar Fernando Torres atë çka përjetoi mbrëmë në “Camp Nou”, në takimin e Atletikos së Madridit ndaj Barcelonës për çerekfinalet e Champions League-s.
Dihej prej ditësh që Torres do të ishte pjesë e formacionit në takimin ndaj katalanasve, si për shkak të formës së mirë që po kalonte kohët e fundit, ashtu dhe për golat e shumtë të shënuar ndaj Barcelonës.
Dhe u duk se mbrëmë do të ishte nata e tij, teksa ai shënoi në minutën e 25-të në portën e katalanasve. Veç epërsisë që i dha Atletikos, ky ishte dhe goli i tij i njëmbëdhjetë ndaj Barcelonës.
Me të në fushë, Atletiko po luante shkëlqyeshëm, por gjithçka do të prishej minuta më pas. Fillimisht Torres mori një karton të verdhë për një ndërhyrje ndaj Nejmarit, për të marrë më pas dhe një tjetër të verdhë për një ndërhyrje ndaj spanjollit Buskets.
Kartoni i kuq e nxjerr atë jashtë loje, për të sjellë më pas dhe rrokullimën për Atletikon, që humbet 2-1.
“Jam i pikëlluar se e lashë ekipin me dhjetë lojtarë,” ka thënë ai. “Ndjehem përgjegjës, sepse me njëmbëdhjetë lojtarë do të kishte qenë krejt ndryshe.”
“Eshtë turp. Mbase ndërhyrja meritonte një karton, mbase jo.”
Ai kthehet të ankohet për gjyqtarin gjerman. “Eshtë turp që UEFA qe më e shqetësuar për bluzat se për caktimin e një gjyqtari të përshtatshëm për një çerekfinale.”
Torres e ka mbyllur me nota optimiste fjalën e tij, “Rezultati nuk është aq i keq. Gjithçka është e mundur në ‘Vicente Calderon’.” /tesheshi.com/
