Një komunikim i zakonshëm elektoral sot në zonën e Korçës, ka nxjerrë në pah faktin se kreu demokrat Basha mund të takohet së afërmi me presidentin amerikan, Donald Trump. Por nga mënyra se si është thënë kjo, ka ngjarë më tepër me një humor momenti, ndonëse kryedemokrati ka tentuar ta servirë si diçka serioze në vërtetësinë e saj.
Ka qenë një fermer ai që, duke folur mbi hallet e fshatit, të mbjellave, prodhimeve, i ka kërkuar Bashës që kur të takohet me Trump-in, t’ja thotë të gjithë këto, pra hallet e tyre si fermerë. Basha i është kthyer duke i thënë se nga e ka marrë vesh që do takohet me Trump-in, dhe kjo disi me të qeshur, për të kobnkluduar më pas në formën e një batute se kjo do të ndodhë “Puna jote nga e more vesh, por mos na i hap sekretet kështu se do mërzitet Ed Rama se nuk e takoi dot”, i tha Basha fermerit.
Ditët pasuese pritet të shihet nëse ka qenë thjesht humor apo diçka e vërtetë. Deri më tani, edhe pse opozita ka tentuar të sajojë një “martesë” politike mes saj dhe administratës Trump, kjo në funksion të politikës së ditës, në realitet nuk ka patur asnjë shenjë që udhëheqja e re e Uashingtonit ta ketë “për zemër” politikisht PD-në në Shqipëri. Madje një vizitë e Bashës në SHBA ditët e çadrës, rezultoi një dështim për shkak të mospasjes së asnjë takimi në nivel të lartë në Shtëpinë e Bardhë, Departamentin e Shtetit apo Senat. /tesheshi.com/
